BAKI,VOA, Fərid Mikayılov

Türkiyədə genişmiqyaslı hüquq-mühafizə əməliyyatları nəticəsində mütəşəkkil cinayət şəbəkələrinə ciddi zərbə endirilib.

VOA xəbər verir ki, Jandarma Komandanlığı koordinasiyasında 12 vilayətdə eyni vaxtda keçirilən əməliyyatlar zamanı 14 ayrı mütəşəkkil cinayət qrupu ifşa olunub.

Məlumata görə, əməliyyatlar çərçivəsində saxlanılan 83 şübhəlidən 49-u məhkəmə qərarı ilə həbs edilib, 23 nəfər barəsində isə digər qətimkan tədbirləri seçilib.

Bildirilib ki, aparılan araşdırmalar zamanı şəbəkə üzvlərinin bank hesablarında ümumilikdə 4 milyard lirədən artıq maliyyə dövriyyəsi müəyyən olunub.

Qeyd olunub ki, əməliyyatlar Türkiyə ərazisində bir sıra vilayətləri əhatə edib və müxtəlif cinayət növləri üzrə fəaliyyət göstərən qruplar zərərsizləşdirilib.

Məlumata əsasən, şübhəlilərin bəzi bölgələrdə miqrant qaçaqmalçılığı, digər bölgələrdə narkotik dövriyyəsi, dələduzluq, sənəd saxtalaşdırılması, silah qaçaqmalçılığı və sələmçilik kimi cinayətlərlə məşğul olduqları müəyyən edilib.

Rəsmi açıqlamada qeyd olunub ki, hüquq-mühafizə orqanları tərəfindən mütəşəkkil cinayətkarlığa qarşı mübarizə qətiyyətlə davam etdiriləcək.