BAKI,VOA, Nailə Babazadə

Türkiyə-Portuqaliya İqtisadi və Ticari Birgə Komitəsinin (JETCO) 5-ci dövr iclası Türkiyənin Ticarət naziri Ömer Bolat və Portuqaliyanın Xarici İşlər naziri Paulo Rangelin həmsədrliyi ilə Lissabonda keçirilib. Görüşdə iki ölkə arasındakı ticari və iqtisadi iş birliyinin gələcək prioritetləri müəyyən edilib.

VOA xəbər verir ki, nazir Ömer Bolat iclasın yekunlarına dair bildirdib ki, tərəflər qarşılıqlı investisiyalar, podratçılıq xidmətləri, sənaye, texnologiya, enerji, kənd təsərrüfatı və müdafiə sənayesi kimi strateji sahələrdə əməkdaşlığı dərinləşdirmək barədə razılığa gəliblər. Eyni zamanda, üçüncü ölkələrdə birgə fəaliyyət imkanları və Gömrük İttifaqının müasirləşdirilməsi başda olmaqla, Avropa İttifaqı gündəmindəki mühüm mövzular ətraflı müzakirə olunub.

Görüşdə iki ölkə arasındakı ticarət dövriyyəsinin ötən il 3,7 milyard dollara çataraq tarixinin ən yüksək səviyyəsinə yüksəlməsindən məmnunluq ifadə edilib. Nazir Bolat vurğulayıb ki, türk iş dünyasının Portuqaliyaya inamı artmaqdadır. Belə ki, üçüncü ölkələr vasitəsilə qoyulan vəsaitlər də daxil olmaqla, Türkiyənin Portuqaliyadakı ümumi investisiyaları artıq 1,6 milyard avroya çatıb.

Liderlər ikitərəfli münasibətləri "qazan-qazan" prinsipi əsasında daha yüksək səviyyəyə çatdırmaq barədə razılığa gəliblər. Nazir Bolat JETCO iclasının hər iki ölkənin şirkətləri arasında yeni işgüzar əlaqələrin qurulmasına və investisiya fürsətlərinin genişlənməsinə mühüm töhfə verəcəyinə inandığını bildirib.