BAKI,VOA, Orxan Qədirzadə

Donald Trampın elan etdiyi 2 həftəlik müvəqqəti atəşkəs qərarına Türkiyənin dövlət rəhbərliyi yüksək səviyyədə reaksiya verib.

VOA xəbər verir ki, Ankaranın rəsmi dairələri atəşkəsi "regional və qlobal sabitlik üçün kritik fürsət" kimi dəyərləndiriblər.

Vitse-prezident Cevdet Yılmaz atəşkəsi müsbət qarşıladıqlarını bildirərək, bu addımın təkcə region üçün deyil, həm də dünya iqtisadiyyatı və təhlükəsizliyi üçün son dərəcə əhəmiyyətli olduğunu vurğulayıb.

AK Partiya sözçüsü Ömer Çelik diplomatik masanın qurulmasını alqışlayaraq "diplomatiya masası qurulmuşkən, bu masanı yıxmaq istəyən provokasiyalara və sabotajlara qarşı beynəlxalq ictimaiyyət oyaq olmalıdır."-deyib.

Çelik səylərinə görə "qardaş Pakistan"ı salamlayaraq, Türkiyənin sülh siyasətinin hər zaman yol göstərici olduğunu qeyd edib.

Prezident Administrasiyasının Kommunikasiya İdarəsinin rəhbəri Burhanettin Duran Türkiyənin böhranlarda hər zaman "təhlükəsiz liman" rolunu oynadığını xatırladaraq, atəşkəsin sadəcə gərginliyi azaltmaqla qalmayıb, qalıcı sülhə qapı açmasını diləyib.

Duran daimi sülhün təməlinin yalnız beynəlxalq hüquq çərçivəsində atıla biləcəyini vurğulayıb.

Atəşkəsin əldə olunmasında Türkiyənin Pakistan və Misir ilə koordinasiyalı şəkildə həyata keçirdiyi "şatll diplomatiyası"nın kilit rol oynadığı məlum olub.