BAKI, AzerVoice, Nailə Babazadə

Türkiyənin daxili işlər naziri Ali Yerlikaya son 5 gün ərzində kiber cinayətkarlıqla mübarizə çərçivəsində keçirilən əməliyyatlarda 259 şübhəlinin yaxalandığını açıqlayıb.

AzerVoice xəbər verir ki, polis qrupları tərəfindən 37 əyalətdə eyni vaxtda həyata keçirilən əməliyyatlar nəticəsində saxlanılanlardan 131-i həbs edilib, 66 nəfər barəsində isə məhkəmə nəzarəti qərarı çıxarılıb. Təhlükəsizlik Baş İdarəsi və MASAK-ın koordinasiyası ilə aparılan araşdırmalar zamanı şübhəlilərin müxtəlif üsullarla vətəndaşları dələduzluq yolu ilə qarət etdikləri müəyyən olunub. Cinayətkar şəbəkə üzvlərinin sosial media platformaları və saxta saytlar vasitəsilə məhsul satışı, avtomobil kirayəsi adı altında insanları aldatdıqları, həmçinin mobil bankçılıq və oyun hesablarına icazəsiz giriş əldə etdikləri üzə çıxıb.

Əməliyyatlar İstanbuldan İzmirə, Diyarbəkirdən Trabzona qədər geniş bir ərazini əhatə edib. Müəyyən edilib ki, şübhəlilər həmçinin qeyri-qanuni mərc oyunlarının təşkili, pul vəsaitlərinin köçürülməsinə vasitəçilik, uşaq pornoqrafiyası və şəxsi məlumatların qanunsuz paylaşılması kimi ağır cinayətlərdə iştirak ediblər.

Ali Yerlikaya sosial media hesabında əməliyyat görüntülərini paylaşaraq vətəndaşları kiber təhdidlərə qarşı diqqətli olmağa çağırıb. Nazir hər hansı şübhəli vəziyyətlə qarşılaşan şəxslərin dərhal 112 Təcili Çağrı Mərkəzinə məlumat verməsini istəyib və əməliyyatda iştirak edən bütün polis əməkdaşlarını təbrik edib.