BAKI, AzerVoice, Nailə Babazadə
Türkiyənin Milli Kəşfiyyat Təşkilatı (MİT) və İstanbul Polis İdarəsinin birgə keçirdiyi əməliyyat nəticəsində FETÖ terror təşkilatı ilə əlaqədə şübhəli bilinən 4 nəfər saxlanılıb.
AzerVoice xəbər verir ki, İstanbul Polis İdarəsindən verilən məlumata görə, Türkiyə Terrorla Mübarizə Şöbəsinin əməkdaşları MİT və Kəşfiyyat Şöbəsi ilə koordinasiyalı şəkildə FETÖ-nün fəaliyyətlərinin ifşa olunması istiqamətində əməliyyat-axtarış tədbirləri həyata keçirib.
Aparılan araşdırmalar zamanı barələrində istintaq aparılan və saxlanılma və ya həbs olunma riski olan şübhəlilərin bundan yayınmaq məqsədilə saxta şəxsiyyət vəsiqələrindən istifadə etdikləri, təşkilata yaxın şəxslərin adına ev kirayələdikləri və təşkilata məxsus “hücrə evlərində” gizləndikləri müəyyən edilib.
Şübhəlilərin FETÖ-nün gizli rabitə proqramı olan ByLockdan istifadə etdikləri, təşkilati toplantılarda iştirak etdikləri, həmçinin fəaliyyəti dayandırılmış Bank Asyada maliyyə əməliyyatlarının olduğu və barələrində axtarış qərarı verildiyi bildirilib.
Bu çərçivədə İstanbulda 4 fərqli ünvana eyni vaxtda keçirilən əməliyyatlar zamanı 4 şübhəli saxlanılaraq polis nəzarətinə götürülüb.
Saxlanılan şəxslərlə bağlı istintaq tədbirləri davam etdirilir.