BAKI, AzerVoice, Nailə Babazadə

Türkiyə Ticarət Nazirliyinin məlumatına görə, Gömrük Mühafizə qrupları tərəfindən Kapıkule və İpsala gömrük-keçid məntəqələrində həyata keçirilən iki ayrı əməliyyat zamanı ümumi dəyəri təxminən 319 milyon 844 min Türkiyə lirəsi olan 525 kiloqram marixuana ələ keçirilib.

AzerVoice xəbər verir ki, Edirne və İpsala Gömrük Mühafizə Qaçaqmalçılıq və Kəşfiyyat İdarələrinin əməkdaşları tərəfindən narkotik cinayətlərlə mübarizə çərçivəsində aparılan risk analizi və hədəfləmə işləri nəticəsində Kapıkule və İpsala gömrük məntəqələrinə gələn iki yük avtomobili şübhəli sayılaraq nəzarətə götürülüb.

Ətraflı axtarış zamanı, narkotik axtaran itlərin iştirakı ilə aparılan yoxlamalarda, avtomobillərin gizli bölmələrində marixuana aşkarlanıb.

Ticarət Nazirliyi bildirib ki, Gömrük Mühafizə qrupları narkotik tacirlərinə qarşı mübarizəsini fasiləsiz davam etdirir və qaçaqmalçılara keçid vermir.

Nazirlik həmçinin vurğulayıb ki, “əsrin qlobal fəlakəti” kimi qiymətləndirilən narkotik ticarəti ilə mübarizə, onların prioritet hədəfləri sırasındadır.