BAKI, AzerVoice, Fərid Mikayılov

Türkiyənin Rusiyadan aldığı S-400 hava hücumundan müdafiə sistemlərinin geri satılacağı barədə yayılan məlumatlara rəsmi cavab verilib.

AzerVoice xəbər verir ki, türk mənbələri iddiaları qəti şəkildə yalanlayıb.

Bəzi media orqanları Türkiyənin 2017-ci ildə 2,5 milyard dollara Rusiyadan aldığı S-400 bataryalarını, Moskvanın tələbi və ehtiyacları əsasında geri sata biləcəyi barədə xəbərlər yayıb.

Türkiyə isə bu iddialara dərhal reaksiya verib. Türk mənbələri Rusiya mediasına açıqlamada belə məlumatların həqiqəti əks etdirmədiyini bildirib.

Xatırladaq ki, Türkiyə 2017-ci ildə Rusiyadan iki ədəd S-400 kompleksi almaq üçün müqavilə imzalayıb. İlk partiya 12 iyul 2019-cu ildə Ankaraya çatdırılıb və Mürted Hava Bazasında görüntüləri dünyaya servis edilib.

Rusiya mediası həmin vaxt S-400 sistemlərinin Türkiyəyə üç mərhələdə təhvil veriləcəyini açıqlamışdı.

Türk mənbələrinin təsdiqinə görə, S-400-lərin satışı və ya Rusiyaya qaytarılması ilə bağlı iddialar tamamilə əsassızdır və mövcud gündəmdə belə bir məsələ yoxdur.