BAKI,AzerVoice, Fərid Mikayılov
Zəlzələ bölgəsində inşa olunan 300 mininci mənzilin açar təhvil mərasimi bu gün Malatyada keçiriləcək.
AzerVoice xəbər verir ki, tədbirdə Prezident Rəcəb Tayyib Ərdoğan və Türkiyənin Ətraf Mühit, Şəhərsalma və İqlim Dəyişikliyi naziri Murat Kurum iştirak edəcək.
Mərasimdə ümumilikdə 54 min 200 müstəqil bölmənin təhvil verilməsi nəzərdə tutulur. Bunlara 43 min 727 mənzil, 4 min 69 iş yeri və 6 min 404 kənd evi daxildir. Tədbir çərçivəsində Hatay, Kahramanmaraş və Adıyaman şəhərləri ilə canlı bağlantı da qurulacaq.
- Hatayda 18 min 348
- Malatyada 11 min 47
- Kahramanmaraşda 6 min 411
- Adıyamanda isə 1 min 474 mənzil ailələrə təqdim ediləcək.
Türkiyənin Ətraf Mühit, Şəhərsalma və İqlim Dəyişikliyii Nazirliyinin məlumatına görə, 6 fevral 2023-cü il Kahramanmaraş mərkəzli zəlzələlərdən sonra 11 şəhərdə 174 ərazidə, 3 min 481 tikinti sahəsində işlər davam edir.
Yeni təhvilatlarla birlikdə bölgədə indiyədək istifadəyə verilən mənzil sayı 249 min 824, iş yeri sayı 8 min 907, kənd evi isə 46 min 105 olacaq. Bununla ümumi təhvil edilən müstəqil bölmələrin sayı 304 min 836-ya çatacaq.
Rəsmi məlumata görə, bölgədə saatda 23, gündə 550 mənzil inşa edilir və fasiləsiz, 7/24 rejimində işlər aparılır.
İlin sonuna qədər 452 min 983 müstəqil bölmənin təhvil verilməsi planlaşdırılır. Bunun 358 min 859-u mənzil, 31 min 307-si iş yeri, 62 min 817-si isə kənd evi olacaq.
“Təhvil verəcəyimiz 300 mininci mənzillə birlikdə zəlzələdən zərər çəkən qardaşlarımıza söz verdiyimiz 453 min evin 70 faizini tamamlamış olacağıq. Bu da hər 3 insandan 2-sinin evinə qovuşması deməkdir. İnşallah, söz verdiyimiz kimi ilin sonuna qədər bütün vətəndaşlarımıza evlərini və iş yerlərini təqdim edəcəyik”- deyə Kurum bildirib.