BAKI, AzerVoice, Nailə Babazadə

Türkiyədə Balıkesirdə baş verən 6,1 bal gücündə zəlzələ nəticəsində ümumilikdə 52 nəfər xəsarət alıb.

AzerVoice xəbər verir ki, bu barədə Türkiyənin səhiyyə naziri Kemal Memişoğlu məlumat verib.

Nazir zəlzələdən zərərçəkənlərin müalicə olunduğu xəstəxanalara baş çəkərək, yaralıların vəziyyəti ilə bağlı məlumat alıb. O, daha sonra Atatürk Şəhər Xəstəxanasında jurnalistlərə açıqlama verib.

Kemal Memişoğlu bildirib ki, xəsarət alanlardan 29-u xəstəxanada yatızdırılaraq və müşahidə altında müalicə alır.

“Hazırda bu xəstələrdən 18-i evə buraxılıb, 11 nəfərin müalicəsi isə davam edir. Onlardan 3-ü birbaşa zəlzələ zamanı xəsarət alıb, digərləri isə qaçarkən yaralanıblar. Bütün xəstələrin vəziyyəti stabildir.”

Nazir hadisə nəticəsində həyatını itirən vətəndaşa baş sağlığı diləyib.

Qeyd edək ki, Türkiyənin Balıkesir vilayətində 6,1 bal gücündə zəlzələ baş verib. Məlumata görə, yeraltı təkanlar yerli vaxtla saat 19:53-də (Bakı vaxtı ilə saat 20:53-də) qeydə alınıb, episentri Balıkesir vilayətində yerləşib.

Zəlzələnin episentri Sındırqı bölgəsində yerləşib, ocağı isə 11 km dərinlikdə olub. Yeraltı təkanlar 20-30 saniyə davam edib və İstanbul da daxil olmaqla Türkiyənin qərbində ən azı 10 bölgədə hiss olunub.