BAKI, AzerVoice , Fərid Mikayılov

İstanbul Sabiha Gökçen Beynəlxalq Hava Limanı tarixinin ən intensiv gününü yaşayaraq, uçuş və sərnişin göstəriciləri də daxil olmaqla, müxtəlif kateqoriyalarda eyni gündə səkkiz rekord qırıb.

AzerVoice xəbər verir ki, hava limanında bir gün ərzində ümumilikdə 158 min 678 sərnişinə xidmət göstərilib.

Rekord göstəricilər həm ümumi uçuş və sərnişin saylarında, həm də beynəlxalq reyslərin gələn-gedən sərnişin və uçuş statistikalarında qeydə alınıb.

Əvvəlki rekord 27 iyul tarixində əldə olunub. Dünən bu rəqəmlər yenilənərək beynəlxalq reyslərlə gələn sərnişin sayı 44 min 446-dan 45 min 715-ə, uçuş sayı isə 237-dən 244-ə yüksəlib.

Gedən sərnişin sayı 43 min 499-dan 45 min-ə çatıb. Beləliklə, beynəlxalq reyslər üzrə ümumi günlük sərnişin sayı 90 min 715-ə qalxıb. Günün ümumi uçuş sayı isə 840 olub.

Sabiha Gökçen Beynəlxalq Hava Limanı, sərnişin axınını sürətləndirmək və rahatlığı artırmaq məqsədilə ötən il təxminən 34 milyon avro dəyərində “Sərnişin Axınını Yaxşılaşdırma Layihəsi”ni həyata keçirib. Terminalda aparılan texnoloji və əməliyyat yenilikləri nəticəsində təhlükəsizlik və pasport nəzarəti prosesləri daha çevik və sürətli hala gətirilib.