BAKI,AzerVoice

İstanbul Sabiha Gökçen Beynəlxalq Hava Limanı (ISG) 27 iyul tarixində eyni gündə yeddi müxtəlif göstərici üzrə rekord yeniləyib.

AzerVoice xəbər verir ki, hava limanı ümumilikdə 157 min 630 sərnişinə xidmət göstərməklə tarixində ən yüksək günlük sərnişin sayına çatıb.

Rəhbərliyin verdiyi məlumata görə, rekordlar əsasən beynəlxalq uçuş və sərnişin statistikalarında qeydə alınıb. Həm gələn, həm də gedən beynəlxalq reyslər üzrə sərnişin və uçuş saylarında əvvəlki maksimum göstəricilər aşılıb.

Rəqəmlərə əsasən, 27 iyulda beynəlxalq reyslərlə gələn sərnişin sayı 43 min 864-dən 44 min 446-ya, gedən sərnişin sayı isə 41 min 969-dan 43 min 499-a yüksəlib. Bu göstəricilərlə birgə beynəlxalq reyslər üzrə gündəlik ümumi sərnişin sayı 87 min 945-ə çatıb. Beynəlxalq uçuşların ümumi sayı isə 475 olaraq qeydə alınıb.

Hava limanı rəhbərliyi bu uğurlu nəticələri “Yolcu Akışını İyileştirme Projesi” çərçivəsində həyata keçirilən infrastruktur və texnoloji yeniliklərlə əlaqələndirir. 34 milyon avro dəyərində həyata keçirilən layihə çərçivəsində təhlükəsizlik və pasport nəzarəti proseslərində tətbiq olunan yeni sistemlər sərnişin axınını sürətləndirib və xidmət keyfiyyətini artırıb.

Coğrafi yerləşməsi, şəhər mərkəzinə yaxınlığı və nəqliyyat əlçatanlığı ilə seçilən Sabiha Gökçen Hava Limanı hazırda İstanbul və ətraf regionları 53 ölkədə 148 istiqamətə 39 daxili və 109 beynəlxalq marşrutla birləşdirir.