BAKI, AzerVoice

Türkiyə Rabitə İdarəsində vəzifə təhvil-təslimi baş tutub – Fahrettin Altun vəzifəsini Burhanəddin Durana təhvil verib.

AzerVoice xəbər verir ki, Türkiyə Prezident Administrasiyası nəzdindəki Rabitə İdarəsində vəzifə təhvil-təslim mərasimi keçirilib.

İdarənin rəhbəri vəzifəsini Prof. Dr. Fahrettin Altun yeni kommunikasiya direktoru təyin olunan Prof. Dr. Burhanəddin Durana təhvil verib.

Fahrettin Altun mərasimdəki çıxışında bildirib ki, yeddi il ərzində Prezident Rəcəb Tayyib Ərdoğanın tapşırığı ilə dövlətin informasiya siyasətini formalaşdırmaq və həyata keçirmək üçün çalışıb.

“Biz strateji kommunikasiya, xalq diplomatiyası, dezinformasiya ilə mübarizə və ölkə brendinqi kimi sahələrdə mühüm addımlar atdıq. Burhanəddin Duran kimi təcrübəli və dəyərli bir insana bu vəzifəni təhvil verdiyim üçün qürur duyuram.” - deyə o bildirib.

Yeni kommunikasiya direktoru Burhanəddin Duran isə çıxışında Fahrettin Altunun yüksək standartlar qoyduğunu və bu mirası daha da gücləndirmək üçün çalışacaqlarını bildirib:

“Rabitə İdarəsi dövlətimizin strateji sütunlarından biridir. Həqiqətə əsaslanan kommunikasiya modeli ilə ölkə daxilində etimadı, xaricdə isə Türkiyənin təsir gücünü artırmaq əsas hədəfimiz olacaq.”

Burhanəddin Duran qeyd edib ki, strateji kommunikasiya və xalq diplomatiyası vasitəsilə Yeni Türk Əsrinin dəyərlərini qlobal miqyasda çatdırmaq üçün səylər davam etdiriləcək.

Qeyd edək ki, Prof. Dr. Burhanəddin Duran uzun illər SETA Strateji Araşdırmalar Vəqfində rəhbər vəzifələrdə çalışıb, akademik fəaliyyəti ilə yanaşı hökumətin informasiya siyasətinə dəstək verib. Onun kommunikasiya direktoru vəzifəsinə təyin olunması Türkiyənin qlobal informasiya strategiyasının yeni mərhələsinə keçidi kimi qiymətləndirilir.