BAKI,AzerVoice

Türkiyə Nəqliyyat və İnfrastruktur naziri Abdulkadir Uraloğlu bildirib ki, Mülki Aviasiya Baş İdarəsi ilə Mavritaniya İslam Respublikasının Milli Mülki Aviasiya Agentliyi arasında mülki aviasiya sahəsində əhatəli əməkdaşlıq memorandumu imzalanıb.

AzerVoice xəbər verir ki, o Türkiyə ilə Mavritaniya arasında ortaq tarixi və mədəni bağların olduğunu xatırladaraq, 2010-cu ildən etibarən qarşılıqlı səfirliklərin açılması ilə ikitərəfli münasibətlərin ciddi şəkildə inkişaf etdiyini qeyd edib.

Nazirin sözlərinə görə, imzalanmış memorandum çərçivəsində uçuş təhlükəsizliyi, hava daşımaları, lisenziyalaşdırma, aviasiya təhlükəsizliyi və ətraf mühitin davamlılığı başda olmaqla bir çox sahədə qarşılıqlı təcrübə və məlumat mübadiləsi nəzərdə tutulur. Tərəflər, eyni zamanda, təlim, rəqəmsallaşma, pilotsuz uçuş aparatları (PUA) və ətraf mühitin qorunması sahələrində də ortaq layihələr həyata keçirməyi planlaşdırırlar.

Nazir Uraloğlu bildirib ki, Türkiyə–Mavritaniya əməkdaşlığı hər iki ölkənin mülki aviasiya sektorlarında potensialın artırılması və beynəlxalq standartlara uyğunluğun gücləndirilməsi baxımından mühüm əhəmiyyət daşıyır. Onun sözlərinə görə, bu razılaşma, Türkiyənin qəbul etdiyi yeni mülki aviasiya modeli və ICAO-nun bacarıq əsaslı prinsiplərini əks etdirən institusional transformasiya modeli çərçivəsində strateji addımdır.

“Türkiyə Mülki Aviasiya Baş İdarəsi Mavritaniya Mülki Aviasiya Təşkilatına texniki dəstək verməyi, institusional potensialı gücləndirməyi və davamlı infrastruktur sistemlərinin inkişafına töhfə verməyi hədəfləyir. Bu çərçivədə beynəlxalq təhsil ixracı da xüsusi əhəmiyyət kəsb edir,” – deyə Uraloğlu vurğulayıb.

Nazir əlavə edib ki, Mavritaniyada həyata keçiriləcək təlim və məsləhətçilik fəaliyyəti Türkiyənin bölgədə – xüsusilə aviasiya təhsili sahəsində – regional mərkəz mövqeyini daha da gücləndirəcək.