BAKI, AzerVoice
Ümumdünya Səhiyyə Təşkilatı (ÜST) Suriyaya dəstəyə görə Türkiyəyə təşəkkür edib.
AzerVoice xəbər verir ki, Ümumdünya Səhiyyə Təşkilatının (ÜST) Şərqi Aralıq dənizi üzrə regional direktoru Hanan Balkhy Türkiyənin Suriyada səhiyyə sektoruna göstərdiyi dəstəyə görə təşəkkür edib və gələcəkdə daha sıx əməkdaşlığa ümidvar olduqlarını bildirib.
Balkhy Suriyada Bəşər Əsəd rejiminin devrilməsindən sonra səhiyyə sistemində baş verən dəyişiklikləri dəyərləndirərək, yeni administrasiya və səhiyyə naziri Musab Nezzal əl-Əli ilə keçirdikləri görüşlərdə səhiyyə infrastrukturunun yenidən qurulmasına dair müzakirələrin aparıldığını vurğulayıb.
“Suriyada səhiyyə sisteminin yenidən təşkilinə və işlək hala gətirilməsinə təcili ehtiyac var. Bu, paytaxt Şam da daxil olmaqla digər şəhərlərdə və kəndlərdə əhaliyə daha sürətli və keyfiyyətli tibbi xidmət göstərilməsini təmin edəcək. İndi yardım göstərmək üçün ən münasib zamandır. Biz maliyyə dəstəyi, tibb təhsili, mövcud infrastrukturun bərpası və səhiyyə sistemlərinin gücləndirilməsi istiqamətində yardım göstərməliyik.” – deyə Balkhy bildirib.
Balkhy əlavə edib ki, ÜST Suriyanın yeni rəhbərliyinin strategiyasını başa düşmək və həm yerli, həm də beynəlxalq tərəfdaşlarla uyğun şəkildə fəaliyyət göstərmək üçün səylərini davam etdirir. Onun sözlərinə görə, təşkilatın nümayəndələri Suriyanı heç vaxt tərk etməyib və ehtiyacları yerində müşahidə ediblər.
Balkhy həmçinin digər BMT qurumlarının da Suriyada səhiyyə sahəsində əməkdaşlığa maraqlı olduğunu bildirərək, “Bu qurumlar Suriya xalqının rifahı üçün çalışır və biz də onların yanında olacağıq”, – deyə qeyd edib.
Sonda Balkhy Türkiyənin bölgədə oynadığı rolu çox yüksək qiymətləndirib.
“Türkiyəyə Suriyaya göstərdiyi dəstəyə görə təşəkkür edirəm. Əgər ölkələr arasında bu cür həmrəylik və əməkdaşlıq olmasa, bölgədə xalqımızın rifahını yüksəltmək mümkün olmaz. Suriyalılara layiq olduqları sağlamlığı və rifahı təmin etmək üçün Türkiyə ilə əməkdaşlığımızın davam edəcəyinə ümid edirik.” - deyə o bildirib.