BAKI, AzerVoice

Qurban bayramı ərəfəsində Türkiyənin 81 şəhərində gücləndirilmiş nəzarət tədbirləri həyata keçiriləcək.

AzerVoice xəbər verir ki, Türkiyənin daxili işlər naziri Ali Yerlikaya Qurban bayramı ilə bağlı təhlükəsizlik tədbirləri barədə ətraflı məlumat verib.

O bildirib ki, bayram günlərində ölkə üzrə nəqliyyatın təhlükəsizliyini təmin etmək məqsədilə polis və jandarma qüvvələrinin iştirakı ilə genişmiqyaslı yoxlamalar aparılacaq.

Nazirin sözlərinə görə, 4 iyun saat 16:00-dan 6 iyun saat 11:00-a qədər müəyyən yollarda TIR və tanker tipli traktorların hərəkətinə icazə verilməyəcək. Bu tədbir nəqliyyat sıxlığının və qəza riskinin qarşısını almaq məqsədi daşıyır.

Bayram dövründə ümumilikdə 69 min polis və jandarma əməkdaşı, 17 min 645 ekipaj və 33 min 943 nəfər heyət yolların təhlükəsizliyinə nəzarət edəcək. Şəhərlərarası avtobuslarda isə gizli sərnişinlər vasitəsilə yoxlamalar aparılacaq.

Nazir qeyd edib ki, sürətə nəzarət üçün radarlar, pilotsuz uçuş aparatları və vertolyotlardan istifadə olunacaq. Magistral yolların 76 faizi jandarma tərəfindən qorunacaq və hər 30 kilometrdən bir radar yerləşdiriləcək. "Vətəndaşlara cərimə yazmaq məqsədimiz deyil. Əsas məqsədimiz insan itkisini və yaralanmaları minimuma endirməkdir", – deyə o bildirib.

Yerlikaya həmçinin sürət həddini aşma, keçid qaydalarının pozulması və qırmızı işıqda keçmə kimi qayda pozuntularının ölümcül nəticələr verdiyini vurğulayıb. Rəqəmlərə əsasən, son illərdə yoxlamalar 50 faiz, cərimələr isə 44 faiz artırılıb. Lakin bu tədbirlər hələ də tam effekt verməyib.

Nazir əlavə edib ki, bayram günlərində yol hərəkəti qaydalarını pozan sürücülərə ciddi cəzalar tətbiq ediləcək. Məsələn, qəza riskinin yüksək olduğu keçid manevrlərinə görə 90 min lirə, yolda dava salanlara isə 180 min lirəyə qədər cərimə tətbiq olunacaq və bu hallarda sürücülük vəsiqəsi ilə avtomobilə məhdudiyyət qoyulacaq.

Qeyd edək ki, 2024-cü ilin əvvəlindən bəri motosiklet qəzalarında 1584 nəfər həyatını itirib. Nazir bu vəziyyətin qarşısını almaq üçün motosiklet sürücülərinə də xüsusi diqqət ayrıldığını bildirib.