BAKI, AzerVoice
Türkiyənin nüvə enerjili sualtı qayıq layihəsinin adı açıqlanıb – “NÜKDEN”.
AzerVoice xəbər verir ki, Türkiyənin
milli müdafiə sənayesi çərçivəsində həyata keçirdiyi nüvə enerjili
sualtı qayıq layihəsi “NÜKDEN” adı ilə təqdim olunub.
Bu ad ilk dəfə İstanbul Dəniz Muzeyində keçirilən 12-ci Dəniz
Sistemləri Seminarında elan edilib.
Hərbi Dəniz Qüvvələri Komandanı Admiral Ərcüment Tatlıoğlu və Sualtı Donanma Komandiri kontr-admiral Timur Yılmaz tərəfindən təqdim olunan layihə, “Nuclear Propelled Submarine” ifadəsinin qısaltması olan “NÜKDEN” kimi adlandırılıb.
“Milli aviadaşıyıcı ilə birgə tapşırıqları yerinə yetirəcək, uzun müddət su altında qala biləcək nüvə enerjili sualtı qayığa sahib olmaq, Türkiyənin təhlükəsizliyi və çəkindirmə qabiliyyəti baxımından vacibdir.” - deyə Kontr-admiral Timur Yılmaz çıxışında qeyd edib.
Nüvə hərəkət sistemləri ilə təchiz ediləcək bu yeni platforma, Türkiyənin MİLDEN (Milli Dənizaltı) layihəsindən sonrakı strateji mərhələni təşkil edəcək. Layihənin məqsədi ölkənin hərbi dəniz qüvvələrinin xarici asılılıqlarını minimuma endirmək və uzaq dəniz əməliyyatlarında öz imkanlarını genişləndirməkdir.
“Tamamilə yerli imkanlarla, xarici asılılıqdan azad nüvə sualtı qayığının inşası 139 illik arzumuzdur. MİLDEN layihəsindən sonra NÜKDEN ilə bu istiqamətdə həlledici addımlar atacağıq.” - deyə Admiral Tatlıoğlu da son açıqlamasında bu təşəbbüsün milli istək olaraq uzun illərdir gündəmdə olduğunu xatırladaraq bildirib.
Qeyd edək ki, Gölcük Gəmiqayırma Zavodunda sualtı qayıqların istehsalı 50 ildir davam edir. Yeni layihə ilə Türkiyə, sualtı çəkindirmə gücünü artıraraq bölgədə və qlobal səviyyədə daha təsirli mövqe qazanmağı hədəfləyir.