BAKI, AzerVoice

Prezident Rəcəb Tayyib Ərdoğan kənd təsərrüfatı gəlirinin 22 il ərzində 24,5 milyard dollardan 74 milyard dollara çatdığını bildirib.

AzerVoice xəbər verir ki, Ərdoğan bu fikirləri Beştepe Konqres və Mədəniyyət Mərkəzində keçirilən Kənd Təsərrüfatı və Meşəçilik Şurasının 4-cü Yekun Bəyannaməsi Proqramında səsləndirib.

O, Dünya Fermerlər Günü münasibətilə fermerləri təbrik edib və ölkənin kənd təsərrüfatı sahəsində əldə etdiyi uğurları vurğulayıb.

Prezident qeyd edib ki, 2002-ci ildən bu yana kənd təsərrüfatı sektoruna real olaraq 2,1 trilyon lirə dəstək verilib, bu il isə fermerlərə ümumilikdə 135 milyard lirə ödəniş ediləcək. O əlavə edib ki, hal-hazırda Türkiyədə 206 növ kənd təsərrüfatı bitkisi yetişdirilir və ölkə özünü tam təmin edir.

Ərdoğanın sözlərinə görə, kənd təsərrüfatı məhsullarının ixracı 2002-ci ildəki 3,8 milyard dollardan 2023-cü ildə 32,6 milyard dollara yüksəlib. O vurğulayıb ki, bu göstəricilərlə son 22 ildə 110 milyard dollarlıq xarici ticarət profisiti əldə olunub.

Qeyd edək ki, Prezident Ərdoğan su ehtiyatlarının və infrastrukturunun kənd təsərrüfatı siyasətində əsas yer tutduğunu bildirib. O, 10 min 663 su təsərrüfatı obyektinin istifadəyə verildiyini, bu sayın Cümhuriyyət tarixində tikilənlərdən üç dəfə çox olduğunu deyib. Əlavə olaraq, 72 milyon hektar suvarılan əkin sahəsi və bu il ərzində 132 milyard lirəlik 321 yeni obyektin istifadəyə verilməsi planlaşdırılır.