Bakı, AzerVoice
2024-cü il Paris Yay Olimpiya Oyunlarında atıcılıq kateqoriyasında yarışan 51 yaşlı türkiyəli idmançı Yusuf Dikeç özünəməxsus duruşu ilə dünya gündəminin diqqətini çəkib.
AzerVoice xəbər verir ki,10 metr pnevmatik tapança kateqoriyasında yarışan Dikeçin yarış zamanı verdiyi poz sosial mediada ciddi müzakirə olunub.
2024 Paris Olimpiadasında atıcılıq kateqoriyasında Türkiyəyə gümüş medal qazandıran 51 yaşlı Jandarma Astsubay Baş Çavuşu Yusuf Dikeç, final yarışmasında sakit və peşəkar üslubu ilə dünyanın diqqətini çəkməyi bacarıb. Rəqiblərindən fərqli olaraq o heç bir texnoloji avadanlıqdan istifadə etmədən, sadəcə standart eynəklə və bir əlini cibinə qoyaraq atışını həyata keçirib. Həmin anda çəkilən foto, İlon Mask və Endrew Tate kimi məşhur şəxslərin paylaşımı ilə dünyada viral olub. Olimpiya Oyunlarının rəsmi X hesabı ilə yanaşı, Eurosport kimi korporativ hesablar tərəfindən də sosial mediada bu kadr çox sayda paylaşım edilərək, milyonlarla rəy və bəyənilmə alıb. Dikeç əli cibində atdığı güllələrlə 10 metr məsafədən pnevmatik tapançadan qarışıq komanda kateqoriyasında gümüş medal qazanıb.
Qeyd edək ki, Fransada keçirilən 2024-cü il Olimpiya Oyunları Türkiyə üçün ilklərə şahidlik edib. Yusuf Dikeç və partnyoru Şevval İlayda Tarhan atıcılıq kateqoriyasında Türkiyəyə medal qazandıran ilk idmançılar kimi tarixə düşüblər. Dikeç – Tarhan cütlüyü Serbiya təmsilçilərinə az fərqlə qalib gələrək , Olimpiya Oyunlarında gümüş medal qazanıb. 51 yaşlı Yusuf Dikeç təqaüddə olan jandarma kiçik zabitidir. O, həmçinin Jandarma Qüvvələri İdman Klubunda idmançı kimi də çalışır. Dikeç bundan əvvəl 2012-ci il London Olimpiadasında Türkiyəni təmsil edib. O, 2013 Aralıq dənizi Oyunlarında da bir qızıl və bir gümüş medal qazanmışdı.
Dikeç trend olan fotosunu paylaşaraq, “Öz istedad və təbii halımla çıxış etmək istəyirdim. Orada sakit dayanmışdım, amma içimdə tufan qopurdu, ürəyim partlayacaq kimi hiss edirdim” , deyərək oyun zamanı olan həyəcanını ifadə edib.
