BAKI, AzerVoice

İraqın Süleymaniyyə şəhərində 400 il əvvəl yazıldığı güman edilən və nəsillər boyu qorunan Qurani-Kərim yerli əhalinin böyük marağına səbəb olub.

AzerVoice xəbər verir ki, Süleymaniyyədən olan İslam alimi Şeyx Həsən Gələzərdənin möhürü olan bu nadir Quran nüsxəsinin dörd əsr əvvəl yazıldığı təxmin edilir.

Tarixi əsər Süleymaniyyənin Gələzərdə kəndində şüşə qabda saxlanılır və şəhərdə keçirilən dini tədbirlər zamanı xalqa açıq şəkildə nümayiş etdirilir.

Vətəndaşlar arasında "Gələzərdə Quran" kimi tanınan bu müqəddəs kitab Süleymaniyyə Universitetinin təşkil etdiyi 2-ci İnanc Festivalı çərçivəsində sərgilənən ən dəyərli əlyazmalar arasında yer alıb. Quranın sülüs xətti ilə yazıldığı, 24x40 sm ölçülərində və 9 sm qalınlığında olduğu bildirilir.

Qeyd edək ki, Qurani-Kərimin bir səhifəsində Şeyx Həsən Gələzərdənin anası tərəfindən yazılmış qeyddə belə deyilir: “Yazımda hər hansı bir səhv varsa, məni bağışlayın”.

Süleymaniyyə Universitetinin İslam elmləri fakültəsinin professoru Adnan Hevremani bu Quran nüsxəsinin bölgə üçün əvəzsiz dəyərə malik olduğunu bildirərək, "Bu nüsxə 400 il əvvələ aiddir və Süleymaniyyədə and içərkən belə insanlar onu nümunə gətirirlər" deyib.

2015-ci ildə bərpa edilən bu tarixi Quran Əzhər Universitetinə aparılaraq orada mükafata layiq görülüb. Əsərin bəzi hissələrinin suya məruz qaldığı, lakin yazılarının toxunulmaz qaldığı qeyd olunur. Hevremani bu əsəri "pul və sərvətlə müqayisə edilməyəcək bir xəzinə" kimi qiymətləndirib.