Bakı, AzerVoice

1952-ci ildən etibarən NATO-nun üzvü olan Türkiyə, alyansın cənub cinahında strateji mövqeyi, güclü ordusu və əməliyyatlara verdiyi dəstəklə vacib rol oynayır.

Türkiyə 18 fevral 1952-ci ildə NATO-ya üzv qəbul edilib. Alyansın üçüncü ilində Yunanıstanla birlikdə qoşulan Türkiyə, hərbi gücü və coğrafi mövqeyi ilə NATO-nun müdafiə strategiyasında vacib yer tutur.

Ölkə hava, quru və dəniz imkanları baxımından NATO-nun ən güclü və unikal üzvlərindən biri hesab edilir. Eyni zamanda, Türkiyə alyansın icra etdiyi missiyalara ən çox töhfə verən ilk beş ölkə sırasında yer alır.

Türkiyə NATO-nun terrorizmlə mübarizə strategiyasına dəstək verərək DEAŞ, Əl-Qaidə, PKK/YPG və FETÖ kimi qruplaşmalara qarşı mübarizə aparır. Həmçinin, Kosovo Qüvvələri (KFOR) çərçivəsində 2023-2024-cü illərdə komandanlıq edib və bölgənin təhlükəsizliyinə töhfə verir.

EYni zamanda, Türkiyə NATO-nun İraq Təlim Missiyasına ən böyük kadr dəstəyi verən ölkələrdən biridir.

Türkiyə, NATO Daimi Dəniz Qrupu-2 və NATO Daimi Minalara Qarşı Mübarizə Dəniz Qrupu-2-yə komandanlıq edir və müttəfiqlərlə birgə keçirilən hərbi təlimlərdə aktiv iştirak edir.

Ölkə həmçinin NATO-nun tərəfdaş ölkələrin müdafiə potensialını gücləndirmə proqramlarına maliyyə və kadr yardımı edir. 2024-cü ildə müdafiə xərclərinin ÜDM-ə nisbəti 2,09% olaraq, NATO hədəfinə çatan 23 ölkədən biri olub.

Türkiyə NATO-nun vacib qərargah və təlim mərkəzlərinə ev sahibliyi edərək Alyansın quru, dəniz və təhlükəsizlik sahəsindəki fəaliyyətlərinə mühüm töhfə verir. İzmir NATO Müttəfiq Quru Komandanlığına (LANDCOM), İstanbul NATO-nun Çevik Yerləşdirilə bilən Korpusuna (NRDC-TÜR) və Dəniz Təhlükəsizliyi Mükəmməllik Mərkəzinə, Ankara isə NATO-nun Terrorla Mübarizə Mükəmməllik Mərkəzinə və Sülh Naminə Tərəfdaşlıq Təlim Mərkəzinə ev sahibliyi edərək Alyansın müdafiə və təhlükəsizlik strukturlarının gücləndirilməsində mühüm rol oynayır.