Bakı, AzerVoice

Türkiyədə “Kaplanlar” adı ilə tanınan mütəşəkkil cinayət qrupuna qarşı keçirilən “Hücre-12” əməliyyatı çərçivəsində 22 şübhəli saxlanılıb.

AzerVoice xəbər verir ki, onlardan 15-i həbs edilib, 7 nəfər isə məhkəmə nəzarəti şərti ilə sərbəst buraxılıb.

Türkiyənin Daxili İşlər Naziri Ali Yerlikaya bildirib ki, Erdemli Respublika Baş Prokurorluğunun koordinasiyası və Mersin İl Təhlükəsizlik Müdirliyinin apardığı araşdırmalar nəticəsində 33 fərqli ünvana eyni vaxtda əməliyyat təşkil edilib.

Saxlanılan şəxslər silahlı hədə-qorxu, silah gücünə sənəd imzalatdıraraq soyğunçuluq, qrup halında ağır soyğunçuluq, qanunsuz silah saxlama, şantaj, qumar təşkil etmə və qanunsuz azadlıqdan məhrum etmə cinayətlərində şübhəli bilinirlər.

Keçirilən əməliyyatlar nəticəsində 7 sənədsiz silah, müxtəlif miqdarda narkotik maddə, çox sayda kəsici və deşici alət, eləcə də rəqəmsal materiallar aşkar edilərək müsadirə olunub.

Nazir Yerlikaya əməliyyatı koordinasiya edən prokurorluq və təhlükəsizlik qüvvələrinə təşəkkür edib.