Bakı, AzerVoice
Türkiyə Milli Kəşfiyyat Təşkilatının (MİT) koordinasiyasında Jandarma Baş Komandanlığı və Milli Kiber Hadisələrə Müdaxilə Mərkəzi (USOM) tərəfindən kibercasusluq əməliyyatında saxlanılan 5 şübhəli həbs edilib.
AzerVoice xəbər verir ki, bu barədə Türk təhlükəsizlik mənbələri məlumat verib.
Məlumata əsasən Ankara respublika baş prokurorluğunun apardığı araşdırmalar çərçivəsində “Avatar” və ya “Ədalət” kimi tanınan proqram təminatının yüzlərlə hüquqşünas tərəfindən istifadə edildiyi və bu proqram vasitəsilə vətəndaşların şəxsi məlumatlarının ələ keçirildiyi müəyyən edilib.
MİT-in İstanbul və İzmirdə eyni vaxtda keçirtdiyi əməliyyat nəticəsində proqram təminatının idarəçisi və tərtibatçıları da daxil olmaqla 5 nəfər həbs edilib.
Bu proqram təminatından hansı vəkillərin istifadə etdiyi ilə bağlı ətraflı araşdırmalar davam edir.
Qeyd edək ki, Türkiyə Maliyyə Cinayətləri İstintaq Şurasının da daxil olduğu istintaq çərçivəsində maliyyə əlaqələri araşdırılmağa başlanıb.