Bakı,
AzerVoice
Türkiyə texnologiya şirkəti ASELSAN, son illərdə Aktiv elektron
skan edilmiş massiv radarı (AESA) əsaslı radar texnologiyalarında
əhəmiyyətli irəliləyişlər əldə edərək, yeni Radar İnteqrasiya
Mərkəzində istehsala başlayıb.
AzerVoice xəbər verir ki, şirkət
dizayn, sınaq və kütləvi istehsal gücünü artırmaq üçün
sərmayələrini davam etdirərək, Radar İnteqrasiya Mərkəzini 50
milyon ABŞ dolları sərmayə ilə qurub.
ASELSAN bu investisiya ilə xarici sifarişlərə olan tələbatı qarşılamağı və radar texnologiyalarında dünya üzrə aparıcı şirkətlərdən biri olmağı hədəfləyir. Açıqlamaya görə, Radar İnteqrasiya Mərkəzi bu ilin əvvəlində fəaliyyətə başlayıb və artıq məhsuldarlıqda ciddi artım əldə edilib.
Şirkət, həmçinin, planlaşdırılan sifarişlər və böyümə
hədəflərinə uyğun olaraq, mövcud radar istehsal gücünü üç dəfə
artırmaq üçün yeni bir obyektin tikintisinə də başlayıb.
Bu obyektin ümumi qapalı sahəsinin 73 min kvadrat metr olması və
2027-ci ilin sonuna qədər tamamlanması gözlənilir.