BAKI,VOA Orxan Qədirzadə
ABŞ Müdafiə Nazirliyi İsraillə bağlı əks-kəşfiyyat təhdidi qiymətləndirməsini mümkün olan ən yüksək səviyyəyə yüksəldib. Qərarın İsrail kəşfiyyat fəaliyyətinin ABŞ rəsmilərinə qarşı getdikcə daha aqressiv xarakter alması ilə bağlı narahatlıqlardan qaynaqlandığı bildirilir.
Məlumata görə, ABŞ Müdafiə Kəşfiyyat Agentliyi son həftələrdə hazırladığı yeni qiymətləndirmədə İsraillə bağlı təhdid kateqoriyasını “kritik” səviyyəyə qaldırıb. Bu, agentliyin istifadə etdiyi ən yüksək təhdid dərəcəsi hesab olunur.
ABŞ rəsmilərinin sözlərinə görə, Vaşinqtonda əsas narahatlıq İsrailin xüsusilə yüksək vəzifəli ABŞ rəsmilərini izləməyə çalışması ilə bağlıdır. Bildirilir ki, məqsəd Prezident Donald Tramp administrasiyasının Yaxın Şərqdəki münaqişələrlə bağlı daxili müzakirələri barədə məlumat əldə etməkdir.
Müdafiə Kəşfiyyat Agentliyinin hazırladığı qiymətləndirməyə yeddi səhifəlik ayrıca sənəd də daxil edilib. Həmin sənəddə ABŞ tərəfinin narahatlığını artıran konkret hadisələrin yer aldığı qeyd olunur.
Təhdid səviyyəsinin yüksəldilməsi Vaşinqton və Təl-Əviv arasında bəzi regional məsələlərdə fikir ayrılıqlarının yarandığı dövrə təsadüf edir. Xüsusilə İranla bağlı müharibə məsələsi, eləcə də İsrailin Livandakı hərbi əməliyyatları səbəbindən Prezident Donald Tramp və İsrailin Baş naziri Benyamin Netanyahu arasında fikir ayrılıqlarının mövcud olduğu bildirilir. Məlumata əsasən, tərəflər arasında son günlərdə keçirilən telefon danışığı da gərgin atmosferdə keçib.
ABŞ və keçmiş hökumət rəsmilərinin, eləcə də müstəqil ekspertlərin qiymətləndirməsinə görə, İsrail Vaşinqtonun İranla bağlı növbəti addımlarını yaxından izləyir. Təl-Əviv xüsusilə Donald Trampın İrana qarşı genişmiqyaslı hərbi əməliyyatları bərpa edib-etməyəcəyi və ya münaqişənin danışıqlar yolu ilə başa çatdırılmasına üstünlük verəcəyi ilə maraqlanır.
Vaşinqtondakı İsrail səfirliyi yayılan məlumatları təkzib edib. Diplomatik nümayəndəlik İsrailin ABŞ hökumət rəsmilərinə qarşı kəşfiyyat fəaliyyəti həyata keçirməsi ilə bağlı iddiaların tamamilə yalan olduğunu bildirib.
ABŞ Müdafiə Nazirliyi məsələ ilə bağlı şərh verməkdən imtina edib. Ağ Ev rəsmilərindən biri isə yayılan məlumatı həqiqətə uyğun olmayan xəbər kimi qiymətləndirib.
Strateji və Beynəlxalq Araşdırmalar Mərkəzinin Müdafiə və Təhlükəsizlik Departamentinin vitse-prezidenti Emili Hardinq isə İsrailin kəşfiyyat xidmətlərini “son dərəcə aqressiv” kimi xarakterizə edib.
Onun sözlərinə görə, İsrail ABŞ administrasiyasının fəaliyyəti və qərarları ilə olduqca yaxından maraqlanır.