BAKI,VOA Orxan Qədirzadə
Koreya Xalq Demokratik Respublikasının lideri Kim Çen In ölkənin hərbi-dəniz qüvvələrinə 10 min tonluq yeni esmines inşa etməyi və məxfi sualtı silah sistemləri hazırlamağı tapşırıb. Qərar Çin Xalq Respublikasının Sədri Si Cinpinin Pxenyana planlaşdırılan səfəri ərəfəsində açıqlanıb.
Ölkənin rəsmi "Rodonq Sinmun" qəzetinin məlumatına görə, Kim Çen In cümə axşamı keçirilən hərbi-dəniz sınaqlarına şəxsən nəzarət edib. O, 5 min tonluq "Kanq Kon" esminesinə qalxaraq gəmi ilə tanış olub, həmçinin digər 5 min tonluq hərbi gəmi olan "Çoe Hyon"u müşahidə edib.
Məlumata əsasən, Kim Çen In son günlər Si Cinpinin səfəri öncəsində müxtəlif hərbi obyektlərə və silah istehsalı müəssisələrinə baş çəkir.
"Kanq Kon" esminesi ötən il suya buraxılma mərasimi zamanı qismən çevrilərək zədələnmişdi. Sonradan gəmi təmir edilərək yenidən istismara hazır vəziyyətə gətirilib.
Kim Çen In bundan bir gün əvvəl yeni istifadəyə verilmiş nüvə materialları istehsalı müəssisəsinə səfəri zamanı ölkənin nüvə arsenalının "həndəsi silsilə ilə" genişləndirilməsinin vacibliyini vurğulayıb.
Çin lideri Si Cinpinin iyunun 8-9-da Pxenyana səfər edəcəyi gözlənilir. Bu, Çin rəhbərinin son yeddi ildə Koreya Xalq Demokratik Respublikasına ikinci səfəri olacaq. Müşahidəçilərin fikrincə, Pekin Moskva ilə yaxın münasibətlər fonunda Pxenyanla əlaqələri daha da möhkəmləndirməyə çalışır. Koreya Xalq Demokratik Respublikası Çin üçün rəsmi müttəfiqlik müqaviləsinə malik yeganə ölkə hesab olunur.
Kim Çen In bildirib ki, ölkənin hərbi-dəniz qüvvələrinin imkanları nüvə hücumlarının qarşısını almaq üçün daha da gücləndirilməlidir. O, həmçinin quru, dəniz və hava qüvvələrinin hər istiqamətdə güclü hərbi potensiala malik olmasının vacibliyini qeyd edib.
Dövlət mediasının yaydığı fotolarda Kim Çen Inın gəmi yoxlaması zamanı qızı ilə birlikdə olduğu da görünür. Məlumatlara görə, onun yanında olan yeniyetmə qız Ju Ae-dir.
Xatırladaq ki, 2025-ci ilin may ayında Koreya Xalq Demokratik Respublikası Çoncin limanında 5 min tonluq esminesin suya buraxılması zamanı qəza baş verdiyini açıqlamışdı. Həmin mərasimdə iştirak edən Kim Çen In hadisəni "bağışlanmaz cinayət əməli" adlandırmışdı.
Gəmi Racin limanında təmir olunduqdan sonra növbəti ay ikinci suya buraxılma mərasimi keçirilib və hərbi gəmiyə "Kanq Kon" adı verilib.
Koreya Milli Birləşmə İnstitutunun aparıcı analitiki Honq Min bildirib ki, Koreya Xalq Demokratik Respublikası ilk dəfədir 10 min tonluq esmines inşa etmək planından açıq şəkildə bəhs edir.
Onun sözlərinə görə, Kim Çen In Si Cinpinin səfəri ərəfəsində ölkəsinin hərbi və texnoloji imkanlarını nümayiş etdirməyə çalışa bilər.