BAKI, AzerVoice, Nailə Babazadə

İstanbul Böyükşəhər Bələdiyyəsinə (İBB) aid istintaq çərçivəsində, “İstanbul Senin” tətbiqi vasitəsilə 4,7 milyon istifadəçinin şəxsi məlumatları və yer məlumatlarının iki ölkəyə sızdırılması iddiası ilə 15 nəfər saxlanılıb.

AzerVoice xəbər verir ki, İstanbul Cumhuriyyət Baş Prokurorluğunun açıqlamasında bildirilir ki, Ekrem İmamoğlu rəhbərliyində fəaliyyət göstərən cinayət təşkilatı ilə bağlı aparılan araşdırmalar zamanı həmin tətbiq vasitəsilə istifadəçi məlumatlarının “darkweb”də satışa çıxarıldığı və “İBB Hanem” adlı alt tətbiqdə 11 milyon vətəndaşın seçki məlumatlarının proqramdan xaricə sızdırıldığı müəyyən edilib.

Araşdırmalar nəticəsində tətbiqdə rəhbər vəzifədə olan, həmçinin İBB-yə bağlı şirkətlərdə çalışmış şəxslər və firari təşkilat rəhbəri Murat Gülibrahimoğlu ilə əlaqəsi olan şəxslər daxil olmaqla 15 nəfərin saxlanılmasına qərar verilib. Saxlanılan şəxslər qanunsuz məlumat əldə etmək, vergi qanunvericiliyini pozmaq və Ekrem İmamoğlu rəhbərliyindəki təşkilata üzv olmaqla bağlı ittiham olunurlar.