BAKI,VOA, Nailə Babazadə
"İmamoğlu mütəşəkkil cinayətkar dəstəsi"nə yönəlik 105-i həbsdə olmaqla, ümumilikdə 407 müttəhim barəsində açılan məhkəmə işinin ilk iclası bu gün başlayır. Məhkəmə prosesinin aprel ayının sonuna qədər həftənin 4 günü davam etməsi planlaşdırılır.
VOA xəbər verir ki, İstanbul 40-cı Ağır Cinayətlər Məhkəməsinin 1-ci heyəti tərəfindən Silivridəki Mərmərə Açıq Həbsxana Kompleksinin məhkəmə zalları binasında keçiriləcək mühakimə prosesində aprel ayının sonunadək bazar ertəsi, çərşənbə axşamı, çərşənbə və cümə axşamı günləri iclaslar keçiriləcək. Məhkəmənin ilk günündə müttəhimlərin şəxsiyyətinin müəyyənləşdirilməsi, ittihamnamənin xülasəsinin oxunması və müdafiə çıxışlarının alınması gözlənilir.
Məhkəmə iclasları saat 10:00-da başlayacaq. Prosesə qatılan müttəhim, şahid, zərərçəkmiş, vəkil, media nümayəndəsi və izləyicilərə xüsusi giriş kartları veriləcək. Zala əvvəlcə tərəflər və vəkillər, daha sonra isə mətbuat işçiləri və izləyicilər buraxılacaq. Məhkəmə heyəti hazırlıqların tamamlanması üçün hələ martın 4-də əlaqədar hüquq-mühafizə və cəzaçəkmə müəssisələrinə rəsmi göstərişlər göndərib.
İstanbul Respublika Baş Prokurorluğu tərəfindən hazırlanan ittihamnamədə Mülki Müfəttişlik Şurası "şikayətçi", bir neçə nazirlik və bələdiyyə qurumları isə "cinayətdən zərər çəkmiş" tərəf kimi tanınıb.
Həbsdə olan müttəhim Ekrem İmamoğlu üçün "cinayət törətmək məqsədilə təşkilat qurmaq", "şəxsi məlumatların qanunsuz saxlanılması və yayılması", "sübutların gizlədilməsi", "rüşvət", "tenderlərdə saxtakarlıq", "çirkli pulların yuyulması" və "dövlət qurumlarını dolandırma" kimi çoxsaylı ağır maddələrlə ümumilikdə 849 ildən 2430 il 6 aya qədər həbs cəzası tələb olunur.
İttihamnamədə digər həbsdə olan şəxslər – Fatih Keleş, Murat Ongun və Adem Soytekin "təşkilat rəhbəri" kimi göstərilir. Fatih Keleş üçün 48 dəfə rüşvət və 55 dəfə tender saxtakarlığı da daxil olmaqla 1542 ilə qədər, Murat Ongun üçün isə 779 ilə qədər həbs cəzası istənilir. Digər müttəhimlər Ertan Yıldız, Adem Soytekin və Murat Gülibrahimoğlu üçün də onlarla və yüzlərlə il həbs cəzası tələb edilir.
Prokurorluq, təşkilat rəhbəri statusunda olan bu şəxslərin özlərinə bağlı qrupların fəaliyyəti çərçivəsində törədilən bütün cinayətlərə görə ayrıca məsuliyyət daşıdıqlarını qeyd edib. Bununla belə, müttəhimlərdən Adem Soytekin, Hüseyin Gün və Ertan Yıldız istintaqa məlumat verdikləri üçün onlar barəsində "səmimi peşmanlıq" maddəsinin tətbiqi və cəzalarının azaldılması xahiş olunub.