BAKI,VOA,Yusif Şərifzadə

Serbiyanın şimalındakı Novi Sad şəhərində minlərlə insan 2024-cü ildə dəmiryolu vağzalında baş vermiş faciənin ildönümü münasibətilə etiraz aksiyasına çıxaraq növbədənkənar parlament seçkilərinin keçirilməsini tələb edib.

VOA xəbər verir ki, aksiya vağzalın giriş örtüyünün uçması nəticəsində 16 nəfərin həyatını itirməsinin ildönümünə həsr olunub.

Həmin hadisədən sonra tələbələrin rəhbərlik etdiyi hökumət əleyhinə etirazlar ölkənin müxtəlif bölgələrinə yayılıb və zaman-zaman zorakılıq halları ilə müşayiət olunub.

Etirazçılar, müxalifət nümayəndələri və hüquq müdafiəçiləri hesab edirlər ki, faciə tikinti layihələrinin idarə edilməsindəki problemlərin və korrupsiyanın göstəricisidir.

Serbiyanın ikinci ən böyük şəhəri olan Novi Sadda keçirilən aksiyada minlərlə insan 30 dərəcəyə yaxın isti hava şəraitində toplaşıb.

Nümayişçilər "Qələbə" şüarları səsləndirib, Prezident Aleksandar Vuçiçi və onun rəhbərlik etdiyi Serbiya Tərəqqi Partiyasını tənqid ediblər.

Bir çox iştirakçı "Tələbələr qalib gəlir" yazılmış köynəklər və plakatlar daşıyıb.

Tələbə hərəkatının fəalları bildiriblər ki, onların məqsədi qarşıdan gələn parlament və prezident seçkilərində hakimiyyətə meydan oxumaqdır.

Növbəti seçkilərin 2027-ci ildə keçirilməsi nəzərdə tutulsa da, Aleksandar Vuçiç yaxın aylarda növbədənkənar seçkilərin elan edilə biləcəyini istisna etməyib.

Aksiyada çıxış edən universitet müəllimi Sanya Beliç azad və ədalətli seçkilər olmadan digər vədlərin mənasını itirdiyini bildirib.