BAKI, AzerVoice, Nailə Babazadə
Türkiyənin Kənd Təsərrüfatı və Meşə Təsərrüfatı naziri İbrahim Yumaklı, ölkədə 2025-ci il ərzində 5 min 832 meşə yanğını ilə mübarizə aparıldığını bildirib. Nazir bildirib ki, hazırda Karabük-Kastamonu sərhədində və Kastamonunun Araç bölgəsində 2 yanğın davam edir.
AzerVoice xəbər verir ki, nazir Yumaklı qeyd edib ki, son 24 saat ərzində 3 fərqli vilayətdə baş vermiş 3 yanğın nəzarət altına alınıb. Lakin Karabükün Eflani bölgəsindən başlayaraq Kastamonunun Araç bölgəsinə yayılan bir yanğın və elə Araç bölgəsində yaranmış digər bir yanğın hələ də davam edir. Hər iki ərazi sıx meşələrlə və çətin relyeflə — qayalıqlar və kanyonlarla — əhatə olunub. Hazırda həm havadan, həm də qurudan genişmiqyaslı müdaxilə tədbirləri görülür.
“1 yanvardan bu günə qədər 5 min 832 yanğınla mübarizə apardıq. Bu rəqəmin özü aparılan mübarizənin miqyasını ortaya qoyur,” – deyə Nazir qeyd edib.
Yumaklı iqlim dəyişikliyi və qlobal istiləşmənin yanğınların artmasında mühüm rol oynadığını vurğulayıb. O əlavə edib ki, yanğınlara sürətli müdaxilə onların böyüməsinin qarşısını alır və vətəndaşların məsuliyyətli davranışı bu mübarizədə böyük əhəmiyyət kəsb edir.
Nazir Yumaklı meşə yanğınlarından zərər görən bütün ərazilərin istisnasız olaraq yenidən yaşıllaşdırılacağını da qeyd edib.
Nazir Karabük, Kastamonu, Bartın, Aydın və Dənizli başda olmaqla yanğınlardan zərər çəkmiş bütün vətəndaşlara “keçmiş olsun” arzularını çatdırıb və qeyd edib ki, yanğınlarla mübarizə zamanı şəhid olan əməkdaşlara Allahdan rəhmət diləyir.
Sonda Nazir, ictimaiyyəti dezinformasiyalara qarşı diqqətli olmağa çağırıb.