BAKI, AzerVoice, Zeynəb Raminqızı
Orta Dəhlizdən sürətli və təhlükəsiz marşrut kimi aktiv istifadə dənizə çıxışı olmayan ölkələrin dayanıqlı inkişafına əhəmiyyətli töhfə verir.
AzerVoice xəbər verir ki, bunu Türkiyənin nəqliyyat və infrastruktur naziri Əbdülqadir Uraloğlu BMT-nin dənizə çıxışı olmayan inkişaf etməkdə olan ölkələr üzrə üçüncü konfransı çərçivəsində Avazada (Türkmənistan) keçirilən plenar iclasda deyib.
O qeyd edib ki, dənizə çıxışın olmaması ticarət üçün əlavə xərclər yaradır, ixracatçıların mənfəətliliyini azaldır və dənizə çıxışı olmayan ölkələrin beynəlxalq bazarlara çıxışını çətinləşdirir.
"Bu kontekstdə Asiya, Avropa və Afrikanın kəsişməsində yerləşən Türkiyə multimodal nəqliyyat dəhlizlərini inkişaf etdirərək, qlobal logistika əlaqələrinin strateji mərkəzinə çevrilir və əsas rol oynayır. Xəzər dənizi üzərindən keçən Şərq-Qərb Orta Dəhlizi beynəlxalq ticarətdə səmərəli və məhsuldar alternativ kimi nəzərdən keçirilir.
Orta Dəhliz sürətli və təhlükəsiz nəqliyyat həlli təklif edir ki, bu da dənizə çıxışı olmayan ölkələrin dayanıqlı inkişafına əhəmiyyətli dərəcədə töhfə verir. Bundan əlavə, gömrük xidmətləri arasında əməkdaşlığın genişləndirilməsi və gömrük prosedurlarının sadələşdirilməsi ticarət axınlarının həcmini xeyli artırmağa imkan verə bilər", – deyə nazir bildirib.
Onun sözlərinə görə, Orta Dəhlizin fəal istifadəsi və beynəlxalq əməkdaşlığın gücləndirilməsi qlobal ticarətin səmərəliliyinin artırılması və həssas regionlarda iqtisadi inkişafın dəstəklənməsi istiqamətində mühüm addım olacaq.
Qeyd edək ki, Orta Dəhliz regionun bir sıra ölkələrindən keçən, Asiya ilə Avropanı birləşdirən nəqliyyat və ticarət marşrutudur. Bu, ənənəvi Şimal və Cənub dəhlizlərinə alternativdir.
Marşrut Çindən başlayır və Qazaxıstan, Özbəkistan və Türkmənistan kimi Mərkəzi Asiya ölkələrindən keçərək, Xəzər dənizi, Azərbaycan, Gürcüstan və Türkiyədən keçərək Avropaya çatır. Orta Dəhliz Asiyanın şərq bölgələrini, o cümlədən, Çini Avropa ilə birləşdirən, daha uzun dəniz yollarından yan keçməklə quru yolu təklif edir.