BAKI,AzerVoice

Özbəkistanın idman naziri müavini, eyni zamanda Özbəkistan Muay-Tay Assosiasiyasının sədri Avazcan Kərimov Beynəlxalq Muay-Tay Assosiasiyaları Federasiyasının (IFMA) vitse-prezidenti, Avropa və Türkiyə Muay-Tay Federasiyasının prezidenti Həsən Yıldızla görüş keçirib

AzerVoice xəbər verir ki, görüşdə son illərdə muay-tayın Özbəkistanda geniş yayılması və idmançıların beynəlxalq yarışlarda yüksək nəticələr göstərmələri üçün yaradılan şərait yüksək qiymətləndirilib.

Avazcan Kərimov bildirib ki, ölkədə bu idman növünə olan maraq sürətlə artır və idmançıların peşəkarlıq səviyyəsini yüksəltmək üçün beynəlxalq təcrübədən yararlanmaq vacibdir.

Müzakirələr zamanı Özbəkistanda muay-tay idmanının daha da inkişaf etdirilməsi məqsədilə bir sıra konkret addımların atılması planlaşdırılıb. Bu çərçivədə Özbəkistana Türkiyədən peşəkar hakimlərin cəlb edilməsi, muay-tay üzrə birgə təlim-məşq toplanışlarının təşkili, müxtəlif beynəlxalq turnirlərin keçirilməsi və təcrübə mübadiləsinin genişləndirilməsi məsələləri müzakirə olunub.

Bundan əlavə, Türk Dövlətləri arasında dünya çempionatının Özbəkistanda keçirilməsi təşəbbüsü də irəli sürülüb.

Həsən Yıldız qeyd edib ki, Türkiyə ilə Özbəkistan arasında idman sahəsində əməkdaşlığın genişləndirilməsi hər iki ölkə üçün faydalı olacaq. Onun sözlərinə görə, Türkiyə muay-tay sahəsində böyük təcrübəyə malikdir və bu bilik və bacarıqlar Özbəkistan idmançıları üçün də yararlı ola bilər.