Bakı. AzerVoice:
ABŞ Dövlət Departamenti Türkiyəyə 40 ədəd F-16 qırıcısının satışı və mövcud F-16-ların modernləşdirilməsi ilə bağlı Konqresə rəsmi bildiriş verib.
AzerVoice xəbər verir ki, bu barədə ABŞ Müdafiə Təhlükəsizliyi Əməkdaşlıq Agentliyi məlumat yayıb.
“ABŞ Dövlət Departamenti F-16-ların alınması və modernləşdirilməsinə və Türkiyə Respublikasına təxminən 23 milyard dollar dəyərində müvafiq avadanlıqların satışına razılıq verən qərar qəbul edib",- deyə məlumatda qeyd edilib.
Açıqlamada F-16-ların Türkiyəyə satışının NATO-nun təhlükəsizliyi və sabitliyi üçün əhəmiyyətli olduğu vurğulanıb və 40 yeni F-16 döyüş təyyarəsi və 79 F-16 modernizasiya dəsti ilə əlaqədar avadanlıqların da Ankaraya satılacağı bildirilib.
ABŞ Konqresinin satışı qiymətləndirmək üçün 15 günlük qanuni müddəti var və bu müddət ərzində etiraz olmasa, satış rəsmi olaraq həyata keçirilir.
Qeyd edək ki, Türkiyə Böyük Millət Məclisinin (TBMM) İsveçin NATO-ya üzvlüyünü təsdiqləməsindən sonra ABŞ prezidenti Co Bayden Konqresə müraciət edərək Ankaraya "F-16" satışını təsdiqləməyə çağırıb.
Xəbərlərimizi “WhatsApp” kanalımızdan oxuyun
