BAKI,VOA,Yusif Şərifzadə

Çinin süni intellekt startapı DeepSeek humanoid robot istehsalçısı Unitree şirkətinin Şanxay birjasındakı ilkin kütləvi səhm təklifinə (IPO) 140,8 milyon yuan (20,8 milyon ABŞ dolları) həcmində sərmayə yatırıb. Tərəflər eyni zamanda humanoid robotlar üçün süni intellekt modellərinin birgə hazırlanması barədə razılığa gəliblər.

VOA xəbər verir ki, bu barədə Şanxay Fond Birjasına təqdim olunan rəsmi sənəddə məlumat verilib.

Razılaşmaya əsasən, DeepSeek strateji yerləşdirmə çərçivəsində 933 399 Unitree səhmi əldə edib ki, bu da ayrılmış səhmlərin 2,31 faizinə bərabərdir.

Hər iki şirkət Çinin Hançjou şəhərində fəaliyyət göstərir və əməkdaşlıq çərçivəsində DeepSeek-in süni intellekt modelləri sahəsindəki təcrübəsi Unitree-nin mexaniki mühəndislik, hərəkətə nəzarət və "təcəssüm olunmuş süni intellekt" (embodied AI) texnologiyaları ilə birləşdiriləcək.

Sənədə görə, Unitree model təlimi və texniki həllərin alınmasında DeepSeek-ə üstünlük verəcək. Eyni zamanda, DeepSeek də robotların alınması və embodied AI layihələrinin inkişafında ilk növbədə Unitree ilə işləyəcək.

Şirkətlər bildirirlər ki, əməkdaşlığın əsas məqsədi humanoid robotların mürəkkəb mühitləri qavramasına və verilən tapşırıqları real fiziki hərəkətlərə çevirməsinə imkan verən "robot beyni"nin hazırlanmasını sürətləndirməkdir.

Hazırda Çin şirkətləri humanoid robotların geyim qatlamaq, qapı açmaq və digər gündəlik tapşırıqları yerinə yetirməsi üçün böyük həcmdə real dünya məlumatları toplayır. DeepSeek isə bu əməkdaşlıq sayəsində robotlardan və toplanacaq fiziki məlumatlardan istifadə edərək çoxmodallı süni intellekt sistemlərini daha da inkişaf etdirməyi hədəfləyir.