BAKI,VOA Orxan Qədirzadə

Suriya ordusunun İraq sərhədində tam səfərbərlik elan etdiyi və məzuniyyətdə olan bütün hərbçilərin təcili şəkildə xidmət yerlərinə qayıtması barədə göstəriş verildiyi bildirilir. Yerli KİV-in məlumatına görə, sərhəd bölgəsinə əlavə hərbi qüvvələr və zirehli texnikanın göndərilməsinə başlanılıb.

Məlumata əsasən, Suriya Müdafiə Nazirliyi sərhəd bölgəsində yerləşən hərbi hissələr üçün yüksək hazırlıq rejimi tətbiq edib. Yerli mənbələr bütün bölmələrin döyüş hazırlığının maksimum səviyyəyə çatdırıldığını və təhlükəsizlik tədbirlərinin gücləndirildiyini bildirir.

İddialara görə, hərbi hissələrə "C dərəcəli" yüksək həyəcan vəziyyətinə keçilməsi barədə əmr verilib. Bu qərardan sonra Suriya–İraq sərhədi boyunca strateji ərazilərə əlavə hərbi bölmələr və çoxsaylı zirehli texnikanın yerləşdirilməsinə başlanıldığı qeyd olunur.

Hadisə ilə bağlı Suriya Müdafiə Nazirliyi hələlik rəsmi açıqlama verməyib. Buna görə də səfərbərliyin səbəbi və əmrin miqyası müstəqil şəkildə təsdiqlənməyib.

Bununla yanaşı, son aylarda Suriya və İraq sərhədində təhlükəsizlik tədbirləri artıq bir neçə dəfə gücləndirilib. Mart ayında Suriya hökuməti regional gərginlik və sərhəd təhlükəsizliyi səbəbindən İraq və Livan sərhədlərinə əlavə qüvvələr yerləşdirdiyini, bu addımın müdafiə xarakteri daşıdığını açıqlamışdı.

İraq tərəfi də 2026-cı ilin əvvəlindən etibarən sərhəd boyunca yüksək hazırlıq vəziyyətini saxladığını və mümkün sızmaların qarşısını almaq üçün əlavə təhlükəsizlik tədbirləri gördüyünü bəyan edib.