BAKI,VOA, Nailə Babazadə

Suriya Müdafiə Nazirliyi regional münaqişənin genişlənməsi fonunda Livan və İraqla sərhəd xəttində hərbi mövcudluğunu gücləndirdiyini açıqlayıb.

VOA xəbər verir ki, məlumata görə, bu addım sərhədlərin qorunması və nəzarətin artırılması məqsədilə atılıb.Hərbi mənbələrin verdiyi məlumata görə, fevral ayından başlayan, lakin son günlərdə sürətlənən əməliyyat çərçivəsində sərhəd boyu "Qrad" və "Katyuşa" raket sistemləri, zirehli texnika və piyada bölmələri yerləşdirilib. Xüsusilə Homsun qərb kəndləri və Tartusun cənubunda 52-ci və 84-cü diviziyaların mövcudluğu genişləndirilib.

Suriya hərbi rəsmiləri bu addımın hər hansı qonşu ölkəyə qarşı hücum məqsədi daşımadığını, əksinə, silah və narkotik qaçaqmalçılığının qarşısını almaq, eləcə də İranın dəstəklədiyi "Hizbullah"ın və ya digər silahlı qrupların Suriyaya sızmasını əngəlləmək məqsədi güddüyünü bildiriblər. Livan təhlükəsizlik rəsmiləri isə Dəməşqin bu hərəkətini "Hizbullah tərəfindən Suriyaya qarşı edilə biləcək hər hansı hücuma qarşı müdafiə tədbiri" kimi qiymətləndiriblər.

İsrailin Livanın cənubuna və Beyruta endirdiyi zərbələr nəticəsində on minlərlə insan evlərini tərk etmək məcburiyyətində qalıb və minlərlə qaçqın Suriya sərhədinə doğru axın edir. Suriya ordusunun bu strateji yerdəyişməsi bölgədə 14 ildir davam edən vətəndaş müharibəsindən sonra yaranmış mürəkkəb təhlükəsizlik balansını qorumaq cəhdi kimi dəyərləndirilir.