BAKI, AzerVoice

Suriyada türk şirkətlərinin də iştirak etdiyi 7 milyard dollarlıq enerji sazişi imzalanıb.

AzerVoice xəbər verir ki, Suriyanın energetika naziri Məhəmməd əl-Bəşir ölkənin enerji sektorunda indiyə qədərki ən böyük sərmayələrdən birini açıqlayıb.

Türkiyənin Kalyon Holding və Cengiz Holding şirkətləri də daxil olmaqla beynəlxalq konsorsiumla imzalanan müqavilənin dəyəri 7 milyard dollardır.

Dəməşqdə imzalanan razılaşmaya əsasən, Suriya ərazisində dörd təbii qazla işləyən elektrik stansiyası və bir günəş enerjisi stansiyası inşa ediləcək. Bu layihələrin ümumi istehsal gücü 5 min meqavat olacaq. Nazir Bəşir bildirib ki, bu saziş Suriyada enerji təminatını gücləndirəcək, iş yerləri yaradacaq və ölkənin sosial-iqtisadi inkişafına təkan verəcək.

Nazir əlavə edib ki, illərlə davam edən beynəlxalq sanksiyalar səbəbindən bir çox sərmayəçi tərəddüd edirdi. Lakin bu maneələrin tədricən aradan qalxması fonunda investorlar daha cəsarətli addımlar atmağa başlayıb. Layihədə bir Amerika, iki Türkiyə və bir Qətər şirkəti iştirak edir və bu, Suriyanın investisiya üçün yeni bir mərhələyə qədəm qoyduğunu göstərir.

Bəşir həmçinin Türkiyə və İordaniya ilə enerji sahəsində əməkdaşlıqların genişləndiyini, 400 kilovoltluq yeni elektrik bağlantı xəttinin istifadəyə verilməsi üçün işlərin davam etdiyini bildirib.

Qeyd edək ki, hal-hazırda Suriyada evlərə gündə orta hesabla 3-4 saat elektrik verilir və mövcud enerji istehsalı təxminən 1500 meqavat təşkil edir. Nazir gələn ilin ilk aylarında bu sahədə nəzərəçarpacaq artım gözlədiklərini bildirib.