Bakı, AzerVoice

Suriyanın müvəqqəti prezidenti Əhməd Əl-Şəraa, Bəşar Əsədin devrilməsindən sonra keçid dövrünü tənzimləyəcək konstitusiya bəyannaməsinin hazırlanması üçün bir komitə yaradıldığını elan edib.

AzerVoice-un məlumatına görə, yeni hökümət Əsədin ötən il dekabrın 8-də vəzifədən uzaqlaşdırılmasından sonra Suriyanı və onun dövlət orqanlarını yenidən qurmağa yönəlib.

Prezident administrasiyasının verdiyi açıqlamada bildirilib ki, keçid dövrünü tənzimləyəcək konstitusiya bəyannaməsini hazırlamaq üçün bir qadın da daxil olmaqla ekspertlərdən ibarət komitə yaradılıb.

Yeddi nəfərlik komitə prezidentə təkliflərini təqdim edəcək, lakin prosesin vaxt çərçivəsi açıqlanmayıb.

Komitəyə aşağıdakı şəxslər daxildir:

Abdulhəmid Əl-Əvak – Konstitusiya hüququ üzrə doktorluq dərəcəsinə malikdir və Türkiyədə universitetdə dərs deyir.

Yasir Əl-Huveyş – Bu il Dəməşq Universitetinin hüquq fakültəsinin dekanı təyin edilib.

Bəhiya Mardini – Komitədə yeganə qadındır, hüquq üzrə doktorluq dərəcəsinə malik jurnalistdir və uzun müddətdir Böyük Britaniyada yaşayır.

İsmayıl Əl-Xalfan – Beynəlxalq hüquq üzrə doktorluq dərəcəsinə malikdir və bu il Hələb Universitetinin hüquq fakültəsinin dekanı təyin edilib.

Məhəmməd Rida Cəlxi – Beynəlxalq hüquq üzrə doktorluq dərəcəsinə malikdir, 2023-cü ildə İdlib Universitetindən məzun olub.

Bu komitənin məqsədi hakimiyyət orqanları arasında balans yaratmaq, ədalət, azadlıq və bərabərlik dəyərlərini müəyyənləşdirmək və hüquq və institutlar dövlətini qurmaqdır.

Qeyd edək ki, yanvar ayının sonlarında, Bəşar Əsədin devrilməsinə rəhbərlik edən İslamçı Həyət Təhrir Əl-Şam (HTŞ) qrupunun lideri olan Əhməd Əl-Şəraa müvəqqəti prezident təyin edilib.

Suriyanın yeni hakimiyyəti Əsəd dövrünün konstitusiyasını ləğv edib, və Şəraa bildirib ki, yeni konstitusiyanın yazılması üç ilə qədər vaxt apara bilər.