BAKI, AzerVoice

Suriya cənubunda baş verən hadisələri yaxından izləyirik və bölgədə yaranacaq istənilən ssenariyə qarşı tam hazırlıqlı vəziyyətdəyik.

AzerVoice xəbər verir ki, açıqlama son günlər Suriya cənubunda dini və məzhəbi motivli toqquşmaların artmasından sonra səsləndirilib.

Ordu tərəfindən yayılan bəyanatda qeyd olunub ki, son iki gün ərzində Suriyada yaralanan druz icmasına mənsub 10 nəfər İsrailə təxliyə edilərək tibbi yardım göstərilib.

Bildirilir ki, İsrailin silahlı qüvvələri artıq bölgədə mövcuddur və onların əsas vəzifəsi düşmən qüvvələrinin druz kəndlərinə daxil olmasının qarşısını almaqdır.

Xatırladaq ki, Suriya prezidenti Bəşşar Əsədin 2024-cü ilin dekabrında devrilməsindən sonra İsrail Suriyanın cənub-qərbində yerləşən bəzi ərazilərə, o cümlədən əvvəllər neytral hesab olunan tampon zonaya nəzarəti ələ keçirib. Bu zonalar beynəlxalq razılaşmalara əsasən əvvəllər neytral ərazi kimi tanınırdı.

Qeyd edək ki, Suriya cənubunda yaşayan druz azlığı həm ölkə daxilində, həm də İsrail və Livan ərazisindəki druz icmaları ilə sıx əlaqədədir.

Bu icma son aylarda hökumət qüvvələri və digər silahlı dəstələrlə toqquşmaların mərkəzinə çevrilib.