BAKI,VOA
Hənif dinimiz olan İslamın beş əsasından biri olan orucu Uca Allah bizdən öncəki toplumlara vacib etdiyi kimi bizə də vacib etmişdir. Allah təalə bunu “Ey iman gətirənlər! Oruc tutmaq sizdən əvvəlkilərə fərz buyurulduğu kimi sizə də fərz buyuruldu ki, bəlkə, günahlardan çəkinəsiniz!” ayəsi ilə bildirmişdir.
Bundan başqa, eyni surənin 185-ci ayəsində də “sizdən kim o aya (Ramazana) çatarsa oruc tutsun” buyuraraq oruc ibadətinin yerinə yetirilməsini əmr etmişdir.
Allah Rəsulu orucun İslamın beş əsasından biri olduğunu bəyan edərək buyurur:
"İslam beş şey üzərində bina edilmişdir; Allahdan başqa ibadətə layiq məbud olmadığına və Muhəmmədin Allahın Rəsulu olduğuna şəhadət etmək, namaz qılmaq, zəkat vermək, həccə getmək və Ramazan orucunu tutmaq."
Buna görə də oruc hər bir ağlı başında olan və həddi-büluğa çatmış müsəlmana vacibdir. Lakin bəzi üzr sahibi şəxslər vardır ki, şəriət onlar üçün oruc tutmamağa icazə vermişdir. Bunlardan biri də xəstə insandır. Xəstə insanın vəziyyəti bir neçə qism ola bilər:
1. Yüngül xəstəliklər
Əgər insanın xəstəliyi yüngüldürsə və orucuna təsir etmirsə, fəaliyyətini zəiflətmirsə, bu halda onun oruc tutması vacibdir, çünki üzrü yoxdur. Məsələn: yüngül baş ağrısı, diş ağrısı və bu kimi sadə narahatlıqlar. Belə hallarda oruc tutmaq digər şəxslərdə olduğu kimi vacibdir.
2. Çətinlik yaradan, lakin həyati təhlükəsi olmayan hallar
Lakin əgər xəstəliklə birlikdə oruc tutmaq insanı yorur və çətinlik yaradırsa, amma həyatına təhlükə qorxusu yoxdursa, bu zaman Allahın verdiyi rüsxətdən (güzəştdən) istifadə edərək oruc tutmaması icazəlidir. Uca Allah buyurur: “Sizdən kim xəstə və ya səfərdə olarsa, tutmadığı günlərin sayı qədər başqa günlərdə tutsun.” Yəni, əgər insan orucu açarsa və ya tutmazsa, sonradan həmin günlərin qəzasını tutmalıdır.
3. Təhlükəli və zərərli hallar
Əgər savadlı, güvənilir və dininə əməl edən bir müsəlman həkimin bildirişiylə və ya xəstənin özünün təsbit etdiyi müəyyən mülahizələri və ya təcrübəsiylə oruc tutmaq böyük ehtimal insanı hər hansı bir təhlükəylə qarşı-qarşıya qoyacaq və yaxud hər hansı bir zərərə səbəb olacaqsa (məsələn, kəskin mədə xorası və qanama riski), bu zaman da orucu açması və ya tutmaması icazəli, hətta vacib olar. Bu şəkildə davranmaq sünnətə və Peyğəmbərimizin yoluna uyğun olar. Çünki Allah buyurur: “Öz əllərinizlə özünüzü təhlükəyə atmayın.”