BAKI,VOA, Fərid Mikayılov

Belçikanın müdafiə naziri Teo Franken ABŞ Prezidenti Donald Trampı İtaliyanın Baş naziri Ciorcia Meloniyə qarşı tənqidlərini dayandırmağa çağırıb.

VOA xəbər verir ki, Avropa yaxın 5-10 il ərzində təhlükəsizliyinin təmin olunması üçün ABŞ-ın hərbi dəstəyinə ehtiyac duyacaq və bu səbəbdən Vaşinqtonla münasibətlər diqqətlə qorunmalıdır.

Bununla belə, Franken qeyd edib ki, Donald Trampın Ciorcia Meloniyə yönəlmiş son açıqlamaları qəbuledilməzdir.

"Əlbəttə, bizə müttəfiq kimi ABŞ lazımdır. Amma Meloniyə toxunmayın. O, Avropada mərkəz sağın kraliçasıdır, lideridir. Onu rahat buraxın", - deyə Belçika müdafiə naziri vurğulayıb.

Franken Melonini Avropanın ən nüfuzlu mühafizəkar siyasətçilərindən biri adlandıraraq, onunla Tramp arasında yaranmış gərginliyin əsassız olduğunu bildirib.

Nazir eyni zamanda vurğulayıb ki, Avropa öz hərbi imkanlarını gücləndirsə də, ABŞ-ın təqdim etdiyi hərbi potensialı tam əvəz etmək üçün ən azı 5-10 ilə ehtiyac var. Onun sözlərinə görə, bu müddət ərzində Avropa ölkələri Vaşinqtonla münasibətlərdə diplomatik yanaşmanı qorumalıdır.

Franken həmçinin Avropa İttifaqında vahid müdafiə bazarının yaradılmasını dəstəklədiyini, müdafiə sifarişlərində proteksionizmin azaldılmasının vacibliyini bildirib.