BAKI,VOA Orxan Qədirzadə
İraq milli komandasının hücumçusu Əymən Hüseyn təkcə vurduğu qollarla deyil, həyat hekayəsi ilə də milyonlarla insanın rəğbətini qazanıb. Uzun illər Dünya Çempionatından kənarda qalan İraq yığmasının 2026-cı il mundialına vəsiqə qazanmasında mühüm rol oynayan futbolçu ağır ailə faciələrinə baxmayaraq zirvəyə yüksəlməyi bacarıb.
Boliviya ilə qarşılaşmada vurulan qol İraq futbolu üçün sadəcə növbəti uğur deyildi. Həmin qol ölkənin 40 illik Dünya Çempionatı həsrətinə son qoyaraq milyonlarla azarkeşin arzusunu gerçəkləşdirdi. Bu uğurun əsas simalarından biri isə milli komandanın liderlərindən olan Əymən Hüseyn oldu.
1996-cı ildə İraqın şimal-orta bölgəsində yerləşən Həvicə rayonunun Səfra kəndində dünyaya gələn futbolçu kənd təsərrüfatı və heyvandarlıqla məşğul olan ailədə böyüyüb. Lakin onun uşaqlıq və yeniyetməlik illəri ağır sınaqlarla müşayiət olunub.
2008-ci ildə yeni evlərinin tikintisi üçün material almağa gedən atası, İraq ordusunda xidmət edən hərbçi olarkən "Əl-Qaidə" terror təşkilatının silahlıları tərəfindən qətlə yetirilib. Bir neçə il sonra isə İraq ordusunda xidmət edən böyük qardaşı terrorçular tərəfindən oğurlanıb. Həmin vaxtdan etibarən onun taleyi barədə heç bir məlumat əldə olunmayıb.
Bu faciələrdən sonra Əymən Hüseyn futbol karyerasını dayandıraraq ailəsinə dəstək olmağı düşünürdü. Lakin anası onun ən böyük dayağı oldu. O, oğlunun futboldan ayrılmasına imkan vermədi və uşaqlıq arzusunun ardınca getməsinin vacibliyini bildirdi. Məhz bu dəstək gələcək ulduzun həyatında dönüş nöqtəsinə çevrildi.
Ağır həyat şəraitinə baxmayaraq, Əymən Hüseyn futbol yolundan dönmədi. Onun peşəkar karyerasında əsas dönüş nöqtəsi 2012-ci ildə Dohuk klubuna transferi oldu. Futbolçu həmin vaxt 18 milyon İraq dinarı dəyərində müqavilə imzalasa da, sonradan açıqlamalarında arzusunu reallaşdırmaq üçün pulsuz oynamağa belə hazır olduğunu bildirib.
Daha sonra paytaxtın aparıcı klublarında – Polis, Tələbə və Zəvra komandalarında çıxış edən hücumçu ölkənin ən perspektivli futbolçularından birinə çevrildi. Sonrakı mərhələdə Qətərdə legioner həyatı yaşayan futbolçu daha sonra yenidən İraqa qayıtdı və Kərmə klubu ilə ölkə futbol tarixinin ən bahalı müqavilələrindən birinə imza atdı. Bir milyon ABŞ dolları dəyərindəki həmin müqavilə onu İraq futbol tarixinin ən bahalı oyunçusuna çevirdi.
Əymən Hüseyn milli komandanın heyətində də bir sıra yaddaqalan uğurlara imza atıb. O, əlavə vaxtda Qətərin qapısına vurduğu qolla İraqı 2016-cı ildə Rio-de-Janeyro Olimpiadasına daşıdı. 2023-cü ildə keçirilən Körfəz Kubokunda üç qolla turnirin bombardiri oldu və komandasının çempionluğunda mühüm rol oynadı.
Hücumçu daha sonra İndoneziya ilə oyunda vurduğu həlledici qolla İraq millisini Paris-2024 Yay Olimpiya Oyunlarına çıxardı. Paris Olimpiadasında da komandanın əsas simalarından biri kimi çıxış etdi.
Milli komandanın uğurlarına baxmayaraq, futbolçu atasının və itkin düşmüş qardaşının bu anları görə bilməməsinin ağrısını daşıdığını dəfələrlə dilə gətirib. O, qazandığı bütün nailiyyətləri ailəsinə həsr etdiyini bildirib.
İndi isə İraq azarkeşlərinin bütün diqqəti Əymən Hüseynə yönəlib. "Mesopotamiya aslanları" ləqəbli komanda 2026-cı il Dünya Çempionatında Fransa, Seneqal və Norveçlə eyni qrupda mübarizə aparacaq.
İraq millisinin qapıçısı və kapitan müavini Cəlal Həsən Əymən Hüseyni yüksək səviyyəli hücumçu kimi xarakterizə edərək onun mundialda komanda üçün həlledici rol oynayacağını bildirib. İraq futbolunun əfsanələrindən olan Hüseyn Səid də futbolçunun həm meydandakı performansını, həm də komanda daxilindəki nüfuzunu yüksək qiymətləndirib. O, Əymən Hüseynin təvazökarlığı və liderlik keyfiyyətlərinin İraqın qrup mərhələsini keçməsinə kömək edə biləcəyini vurğulayıb.
Bununla yanaşı, İraq azarkeşlərini ABŞ-də keçiriləcək mundial zamanı müəyyən çətinliklər gözləyir. Azarkeşlər viza prosedurlarının mürəkkəbliyi və yüksək maliyyə xərclərinin böyük problem yaratdığını bildirirlər. Hesablamalara görə, yalnız bir oyunun bilet qiyməti bir neçə min dollara başa gələ bilər. Səyahət və yaşayış xərcləri də əlavə olunduqda ümumi məbləğ 15 min ABŞ dollarını ötə bilər.
Beləliklə, milyonlarla iraqlının arzuları və ümidləri dünya çempionatında meydançaya çıxacaq futbolçuların, xüsusilə də həyatın ən ağır sınaqlarından keçərək ölkənin qəhrəmanına çevrilən Əymən Hüseynin üzərinə düşəcək.