BAKI,VOA, Fərid Mikayılov
ABŞ Federal Təhqiqat Bürosu (FTB) və ABŞ Ədliyyə Nazirliyi Ağ Evdə təşkil olunan UFC turnirinə qarşı hazırlanan irimiqyaslı və dəhşətli suiqəsd planının qarşısını alıb. Rəsmi açıqlamaya görə, kəskin nişançılar və partlayıcı yüklü dronlarla həyata keçirilməsi planlaşdırılan terror aktı ilə bağlı 5 şübhəli şəxs xüsusi əməliyyatla gözaltına alınıb.
VOA xəbər verir ki, prokurorluq bəyan edib ki, cinayətkar qrup Ağ Evin ətrafındakı binaları dronlarla vuraraq kütlə arasında vahimə yaratmağı, daha sonra isə panika içində qaçan insanlara və turnirə qatılan yüksək rütbəli rəsmilərə kəskin nişançılar vasitəsilə atəş açmağı hədəfləyib.
Planın "ikinci dalğasında" isə digər qruplaşma üzvlərinin Ağ Evin darvazalarına hücum etməsi nəzərdə tutulub. Şübhəlilərin şifrəli mesajlarında "həddindən artıq radikal dini və hökumət əleyhinə" ideoloji fikirlər paylaşdığı müəyyən edilib.
FTB Direktoru Kaş Patel sosial media hesabından bildrib ki, 5 fərqli ştatda eyni vaxtda keçirilən koordinasiyalı reydlər nəticəsində qanlı plan tamamilə çökdürülüb. Tutulan şəxslərin 19 yaşlı Taysen Proper, 24 yaşlı Brayan Roa , 32 yaşlı Maykl Tomas , 32 yaşlı Daniel Eskric və 31 yaşlı Abraham Alvarez olduğu açıqlanıb. Onların hər biri "qəsdən adam öldürməyə cəhd üçün sui-qəsd qurmaq" maddəsi ilə ittiham olunurlar.
Məhkəmə sənədlərinə görə, Ağ Evin Cənub Bağçasında (South Lawn) dəvətlilər üçün təşkil olunan və 4 min 300 nəfərin izlədiyi tədbir zamanı ətraf ərazilərdə də 85 minə yaxın azarkeş döyüşləri təqib edirmiş. Terrorçuların əsas hədəfləri arasında ABŞ Prezidenti Donald Tramp, vitse-prezident Cey Di Vens , İsrail Baş naziri Benyamin Netanyahu, milyarder İlon Mask və bir neçə konqresmenin adının olduğu qeyd edilib.
Dəhşətli terror planının üstü şübhəlilərdən 19 yaşlı Taysen Properin anasının fədakarlığı sayəsində açılıb. Ana, oğlunun qısa müddətdə külli miqdarda silah-sursat almasından və internetdə özlərini sabiq hərbi qulluqçu kimi təqdim edən radikal xristian qruplaşması ilə yazışmalarından şübhələnərək hüquq-mühafizə orqanlarına müraciət edib.