BAKI,VOA,Yusif Şərifzadə

İranın futbol federasiyası ABŞ-ı Dünya Çempionatının qrup oyunları üçün özünə ayrılmış biletləri ləğv etməkdə günahlandırıb və qarşı tərəfi İran azarkeşlərinin iştirakına mane olmaqda ittiham edib. Bu hadisə diplomatik gərginliyin fonunda baş verib.

VOA xəbər verir ki, ABŞ dünya futbol tədbirində İrana bir sıra bürokratik maneələr yaradıb. Onlardan biri də dəstək heyətinin bəzi üzvlərinə viza verməkdən imtina olunmasıdır. Bu addımlar fevralın sonlarında ABŞ və İsrailin hücumlarından sonra yaranan münaqişə vəziyyəti ilə üst-üstə düşür.

İran futbol qurumu bildirib ki, FIFA qaydalarına görə, hər oyuna federasiyalara azarkeşlərinə rəsmi kanallar vasitəsilə paylanmaq üçün 8 faiz bilet ayrılmalıdır. Bəyanata görə, İran artıq Yeni Zelandiya, Belçika və Misirə qarşı qrup mərhələsi oyunları üçün biletlərin satışına başlamışdı və bəzi azarkeşlər lazımi hazırlıqları görmüşdü.

“Lakin gözlənilməz bir addımla, İran Futbol Federasiyasına verilmiş paylama ləğv edilib və mövcud şəraitdə federasiya milli komandanın azarkeşlərinə tək bir bilet belə təqdim edə bilmir,” bəyanatda qeyd olunub.