BAKI, AzerVoice, Fərid Mikayılov

Beşiktaş, İtaliyanın Atalanta klubundan hücumçu El Bilal Toure-ni icarəyə götürmək üçün danışıqlara başladığını açıqlayıb.

AzerVoice xəbər verir ki, bu barədə klubun KAP-a göndərdiyi açıqlamada bildirilir.

“Futbolçu El Bilal Toure-nin müvəqqəti transferi üçün oyunçu və Atalanta klubu ilə danışıqlara başlanılmışdır”- deyə bildirilib.

Klub 23 yaşlı forvardın bu gün Bakı vaxtı ilə saat 15:45-də İstanbulda olacağını bildirib.

Ötən mövsümü Almaniyanın Ştutqart klubunda icarə əsasında keçirən Toure 17 oyunda 3 qol, 1 məhsuldar ötürmə ilə yadda qalıb.

2001-ci il oktyabrın 3-də Fil Dişi Sahilində dünyaya gələn El Bilal Toure beynəlxalq arenada Mali millisinin heyətində çıxış edir.

O, peşəkar karyerasına Fransanın Reyms klubunda başlayıb və iki mövsümdə 64 oyuna 9 qol vurub. Daha sonra İspaniyanın “Almeriya” klubunda 21 matçda 7 dəfə fərqlənərək Avropa klublarının diqqətini cəlb edib.

2023-cü ilin yayında Atalantaya transfer olunan gənc hücumçu klub tarixinin ən bahalı futbolçularından biri olub. Oyun üslubunda sürət, pres gücü və fiziki dayanıqlılığı ilə seçilən Toure, Mali milli komandası ilə 25 oyunda 9 qol vuraraq komandasına mühüm töhfələr verib.