BAKI, AzerVoice, Fərid Mikayılov

UEFA Çempionlar Liqasının III təsnifat mərhələsində Şimali Makedoniyanın Şkendiya komandası ilə qarşılaşacaq “Qarabağ” klubunun oyunlarına təyinat alan hakimlər müəyyənləşib.

AzerVoice xəbər verir ki, UEFA-nın rəsmi məlumatına görə, avqustun 5-də Skopyedə keçiriləcək ilk oyunu Slovakiyadan olan beynəlxalq dərəcəli hakim İvan Kruzliak idarə edəcək.

Ona yan xətt hakimləri kimi həmyerliləri Branislav Hançko və Yan Pozor kömək edəcəklər. Dördüncü hakim funksiyasını Peter Kraloviç yerinə yetirəcək. Oyunda VAR sistemi də tətbiq olunacaq və bu sahəyə Mixal Oçenaş ilə Boris Marhefka nəzarət edəcəklər.

Cavab oyunu avqustun 12-də Bakıda keçiriləcək. Bu qarşılaşmanın baş hakimi Niderland Futbol Federasiyasını təmsil edən FİFA hakimi Danni Makkelie olacaq. Ona Hessel Steegstra və Jan de Vries kömək edəcəklər. Dördüncü hakim kimi Mark Nagtegaal təyin olunub. VAR sistemi isə Dennis Higler və Richard Martens tərəfindən idarə olunacaq.

Xatırladaq ki, Qarabağ bu mərhələni uğurla keçəcəyi təqdirdə, UEFA Çempionlar Liqasının pley-off mərhələsinə vəsiqə qazanacaq.