BAKI, AzerVoice

Tanınmış rusiyalı promouter və Fight Nights Global təşkilatının rəhbəri Kamil Hacıyev, hazırda dünya çempionu olan Aleksandr Usiki yalnız yüksək motivasiyaya sahib Tayson Fyurinin məğlub edə biləcəyini bəyan edib.

AzerVoice xəbər verir ki, Hacıyev bir çoxlarının Usikin son rəqibi Deniel Dübuanı favorit hesab etməsinə təəccübləndiyini bildirib

“Dübuanı favorit hesab edənlərə təəccüblənirəm. Usik özünü məşqlərə məcbur etməyə davam etdiyi müddətdə onu heç kim rinqdə məğlub edə bilməz. Yalnız olduqca motivasiyalı bir Tayson Fyuri bu gücdədir”- deyə o bildirib.

Xatırladaq ki, iyulun 20-nə keçən gecə Londondakı “Uembli” stadionunda baş tutan döyüşdə Aleksandr Usik britaniyalı Deniel Dübua üzərində beşinci raundda texniki nokautla qələbə qazanıb. Qarşılaşmanın sonunda Usikin zərbələri nəticəsində Dyubua yerə yıxılıb və hakim döyüşü dayandıraraq nokaut qərarı verib.

Həmçinin qeyd edək ki, Usik və Fyuri arasında indiyədək iki döyüş keçirilib. Birinci qarşılaşma 2024-cü ilin mayında olub və Usik həmin döyüşdə hakimlərin yekdil qərarı ilə qalib gələrək super-ağır çəkidə bütün titul kəmərlərini ələ keçirib.

İkinci döyüşdə də hakimlər Usikin Fyuri üzərində üstünlüyünü tanıyıblar, baxmayaraq ki, Fyuri nəticəyə etiraz edərək üstünlüyün özündə olduğunu iddia edib.

Aleksandr Usik son müsahibəsində Tayson Fyurinin boks karyerasını davam etdirdiyi təqdirdə onunla üçüncü döyüşə çıxmağa hazır olduğunu vurğulayıb.