BAKI,AzerVoice

Qalatasaray, Ziraat Türkiyə Kubokunun 1/4 finalında qonaq olduğu Fənərbağçanı 2-1 hesabı ilə məğlub edərək yarımfinalda TÜMOSAN Konya sporun rəqibi oldu.

AzerVoice xəbər verir ki, Ülker Stadionunda keçirilən qarşılaşmaya yaxşı başlayan sarı-qırmızılar, 10-cu dəqiqədə Viktor Osimhenin vurduğu gözəl qolla 1-0 önə keçdi.

Oyuna nəzarəti əlində saxlayan və hücumlarını davam etdirən Qalatasaray, 27-ci dəqiqədə Osimhenin penaltidən vurduğu qolla fərqi iki topa çıxardı. Aydın qol fürsətləri qazanan sarı-qırmızılar, 45+1-ci dəqiqədə Sebastian Şimanskidən gələn qola mane ola bilməsə də, fasiləyə 2-1 öndə yollandı.

Matçın ikinci hissəsində hər iki komanda bir neçə qol fürsətindən yararlana bilmədi. Gərgin keçən ikinci 45 dəqiqədə hesab üstünlüyünü qoruyan Qalatasaray, adını yarımfinala yazdırdı.

Matçın bitimindən sonra orta sahədə Okan Burukun yanına gedən portuqaliyalı məşqçi Joze Mourinho, Burukun üzünə əlini uzadaraq burnunu sıxdı. Mourinhoya oyunçusu İrfan Can Kahveçi mane olmağa çalışarkən, Okan Buruk acı içində yerə çökdü.

Qarşılaşmada Qalatasaraydan 2 futbolçu ehtiyat oyunçular skamyasında qırmızı kart görərkən, meydanda da 4 sarı-qırmızılı futbolçu sarı kartla cəzalandırıldı.

Fənərbağçada isə 1 futbolçu skamyada qırmızı kart alarkən, meydanda 5 oyunçuya sarı kart göstərildi.

Derbidə ümumilikdə 3 qırmızı, 9 sarı kart qeydə alınarkən, texniki heyətdən olan bəzi şəxslər də kart cəzası aldı.