BAKI,AzerVoice

1 800-dən çox aktyor, prodüser və sənətçi, o cümlədən bir sıra Hollivud ulduzları İsrailin kino institutları ilə əməkdaşlıq etməməyə dair sənədi imzalayıb. AzerVoice xəbər verir ki, onlar bu qurumları fələstinlilərə qarşı həyata keçirilən hüquq pozuntularında və soyqırım siyasətində iştirak etməkdə ittiham edirlər.

“Apartheyd dövründə filmlərini Cənubi Afrikada nümayiş etdirməkdən imtina edən rejissorların mövqeyindən ilhamlanaraq, biz də filmlərimizi İsraildə nümayiş etdirməyəcəyik, İsrail kino institutları ilə işləməyəcəyik. Bu, festivallar, kinoteatrlar, yayım qurumları və istehsal şirkətlərini əhatə edir.”-deyə, sənəddə qeyd olunur.

Bəyanatda vurğulanır ki, çağırış israillilərlə əməkdaşlığın dayandırılması deyil, məhz “insan haqlarını pozan İsrail institutları ilə əməkdaşlığın rədd edilməsi”dir.

Hüquq müdafiəçiləri bildirirlər ki, İsrailin kino institutları Fələstinlilərə qarşı zorakılıqları “ört-basdır etmə” və ya “haqlı göstərmə” prosesində rol oynayıb. Onlar həmçinin Beynəlxalq Ədalət Məhkəməsinin İsrailin Fələstin torpaqlarındakı işğalını qeyri-qanuni sayan qərarına, eləcə də ekspertlərin Qəzzadakı hərbi əməliyyatları “soyqırımı səviyyəsində” qiymətləndirməsinə istinad ediblər.

Boykot sənədinə imza atanlar arasında Oliviya Kolman, Emma Stoun, Mark Ruffalo, Tilda Swinton, Riz Ahmed, Xavyer Bardem və Sintiya Niksan kimi məşhur adlar da var.

İsrail hökuməti isə bu cür boykot çağırışlarını “diskriminasiya” adlandıraraq rədd edib. Rəsmi Tel-Əviv Qəzzada həyata keçirilən əməliyyatların 2023-cü ilin oktyabrında Həmasın hücumuna cavab olaraq “özünümüdafiə” xarakteri daşıdığını bildirir. Həmin hücum nəticəsində İsrailin məlumatına görə, 1 200 nəfər öldürülmüş, 250-dən çox insan girov götürülmüşdü.

İsrailin ardınca başladığı hərbi əməliyyatlar on minlərlə insanın ölümünə, bütün Qəzza əhalisinin köçkün düşməsinə və aclıq böhranına səbəb olub.

Ötən həftə Venesiya Film Festivalında İsrail ordusunun ötən il Qəzzada qətlə yetirdiyi 5 yaşlı fələstinli qız haqqında çəkilən “Hind Rəcəbin səsi” filmi böyük maraqla qarşılanıb. Filmin icraçı prodüserləri arasında Brad Pitt və Xoakin Feniks də yer alır.