BAKI,AzerVoice
Sudanın qərbində, Şimali Darfur vilayətinin paytaxtı Əl-Faşir şəhərində son günlər baş verən qanlı hadisələr ölkədəki müharibənin ən dəhşətli mərhələlərindən birinə çevrilib.
Sudanın Sosial Rifah üzrə Dövlət naziri Səlima İshaqın məlumatına görə, şəhəri ələ keçirən Sürətli Dəstək Qüvvələrinin döyüşçüləri ilk iki gün ərzində azı 300 qadını qətlə yetirib.
Nazir bildirib ki, qadınlar cinsi zorakılığa, işgəncəyə və fiziki şiddətə məruz qalıblar. Onun sözlərinə görə, “Əl-Faşirdən Toilaya çıxmağa çalışan hər kəs ölüm təhlükəsi altındadır, çünki bu yol artıq ‘ölüm yolu’na çevrilib”.
Səlima İshaq əlavə edib ki, şəhərdə hələ də işgəncə, təhqir və cinsi zorakılığa məruz qalan ailələr var. O, baş verənləri “sistemli etnik təmizləmə” və “bütün dünyanın susqunluğu ilə müşayiət olunan böyük bir cinayət” adlandırıb.
Sudan hökuməti noyabrın 1-də BMT-nin İnsan Hüquqları üzrə Ali Komissarlığına və digər beynəlxalq qurumlara Əl-Faşirdə SDQ tərəfindən törədilən dəhşətli cinayətlər barədə rəsmi məlumat təqdim edib.
SDQ-nin komandiri Məhəmməd Həmdan Daqlu oktyabrın 29-da öz qüvvələrinin şəhərdə “pozuntulara yol verdiyini” etiraf edib və bu istiqamətdə “daxili istintaq komissiyalarının yaradıldığını” bildirib.
Sudanda 2023-cü ilin aprelindən bəri ordu ilə Sürətli Dəstək Qüvvələri arasında davam edən silahlı qarşıdurma on minlərlə insanın ölümünə və təxminən 13 milyon nəfərin ölkə daxilində və xaricə qaçqın düşməsinə səbəb olub.
Hazırda SDQ Darfur bölgəsinin beş vilayətinin hamısına nəzarət edir, ordu isə cənub, şimal, şərq və mərkəz bölgələrində yerləşən 13 vilayətdə, o cümlədən paytaxt Xartumda nəzarəti saxlayır.