BAKI,VOA,Yusif Şərifzadə

İran Təhsil Nazirliyi ABŞ-ın yenidən başladığı hücumlar fonunda ölkənin altı vilayətində bəzi orta məktəb şagirdləri üçün nəzərdə tutulan buraxılış imtahanlarını təxirə salıb.

VOA xəbər verir ki, nazirliyin açıqlamasına əsasən, 12-ci sinifdə bütün təhsil istiqamətləri üzrə keçiriləcək yekun imtahanların vaxtı dəyişdirilib.

İmtahanların əvvəlcə cümə axşamı və şənbə günlərində keçirilməsi nəzərdə tutulurdu.

Təhsil Nazirliyi imtahanların hansı tarixlərdə keçiriləcəyi barədə hələlik yeni cədvəl açıqlamayıb.

Bundan əvvəl nazirlik həssas və ya hərbi obyektlərin yaxınlığında yerləşən imtahan mərkəzlərinin daha təhlükəsiz ərazilərə köçürüldüyünü bildirmişdi.

Qərarın şagirdlərin, müəllimlərin və imtahan prosesində iştirak edən digər şəxslərin təhlükəsizliyinin təmin olunması məqsədilə qəbul edildiyi qeyd olunur.

ABŞ-ın İrana qarşı son hücumları ölkənin müxtəlif bölgələrində gündəlik həyata və təhsil prosesinə də təsir göstərməyə başlayıb.

İran rəsmiləri təhlükəsizlik vəziyyətindən asılı olaraq imtahanların yeni tarixlərinin sonradan elan ediləcəyini bildiriblər.